Kuri uyu wa kabiri tariki ya 29/08/2017, Ingabo z’u Rwanda zo muri Division ya mbere zatanze imashini zuhira zigera kuri 15  n’ibikoresho bijyana nazo ku makoperative 11 y’abahinzi akorera mu karere ka Rwamagana. Izi mashini zikaba zizabafasha mu kuhira imyaka yabo mu gihe cy’izuba bityo bagahinga mu bihe byose.

Umuyobozi w’ingabo mu karere ka Nyagatare, Gatsibo, Kayonza na Rwamagana Col Rutikanga J. Bosco afatanyije n’umuyobozi w’akarere ka Rwamagana nibo bashyikirije aba baturage imashini, mu ijambo rye yibukije abaturage ko ibi bikorwa by’ingabo bigamije kubatera ingabo mu bitugu no kubafasha kuzamura ubuhinzi bwabo.

Umuyobozi w’akarere ka Rwamagana Mbonyumuvunyi Rajab yashimye uburyo ingabo z’u Rwanda zabunganiye mu bikorwa bitandukanye birimo ubuvuzi bwakozwe n’ingabo mu minsi ishize mu gikorwa cya Army Week ndetse n’imbaraga nyinshi ingabo zashyize mu kurwanya nkongwa. Meya akaba yasabye abahinzi gukora cyane no kuzabyaza umusaruro izi mashini bahawe.

Imashini zatanzwe n’ingabo z’igihugu zahawe amakoperative 11 yo mu mirenge 5; Mwurire hatanzwe3, musha ni 2, Karenge ni 5, Nyakariro 1, Gishari naho ni 3 izi zose zika zagenewe amakoperative y’ubunzi aho bazuhira bifashishije amazi y’ibiyaga bya Muhazi na Mugesera, naho abatagera ku biyaba bo bazifashisha amazi y’ibishanga.

Share Button