Kuri iki cyumweru tariki ya 17/02/2019, Ubuyobozi bw’ishyirahamwe ry’uturere n’umujyi wa Kigali (RALGA), ba Guverineri b’intara na Meya w’umujyi wa Kigali ndetse n’abayobozi b’uturere twose basuye icyumba ntangamakuru (Situation room) gitanga amakuru y’uburyo Akarere ka Rwamagana kagenda gacyemura ibibazo byari byugarije abaturage (Human Security Issues), uko imihigo ishyirwamubikorwa(Imihigo Implementation progress) ndetse na gahunda yo kwihaza mu biribwa (Food security).

Meya Mbonyumuvunyi Radjab yabwiye aba bashyitsi ko mbere yo gucyemura ibibazo byari bibangamiye umudendezo w’abaturage, habanje gukusanywa amakuru yose uhereye ku rwego rw’umudugudu (Profiling) kandi buri rwego rusinyira ko amakuru yatanzwe ari ukuri. Meya Mbonyumuvunyi Radjab yongeyeho ko mu gucyemura ibi bibazo inzego zose zifatanya, ariyo mpamvu usanga buri mukozi mu karere abasha gusobanura ibyagezweho ndetse n’ingamba zo kubisigasira. Yababwiye ko no mu mihigo ari uko abakozi b’Akarere bakora, ko imihigo iba ireba buri wese hatitawe kuvuga ngo uyu ashinzwe iki. Ahubwo buri mukozi wese, aba afite ubushobozi bwo kuba yasobanura imihigo ya mugenzi we kandi akabikora neza.

Mu bashyitsi bari basuye iki cyumba, Meya Kayitesi Alice uyobora Akarere ka Kamonyi yavuze ko yashimishijwe n’amakuru yabonye kandi ko muri iki cyumba ntangamakuru ahigiye byinshi bijyanye n’uburyo bwo gukurikirana no gucyemura ibi bibazo biba bibangamiye umudendezo w’umuturage. Yavuze ko yishimiye ko asanze abo baje kwigiraho ari abahanga kandi bishimira gutanga ubumenyi bwabo.

Mu izina ry’abayobozi b’uturere, Meya Gasana Richard uyobora Akarere ka Gatsibo yashimiye ubuyobozi bw’Akarere ka Rwamagana uburyo bwishimira gutanga amakuru ku muntu wese ubusuye ndetse asaba abandi bayobozi b’uturere ko buri wese ubishatse yazafata umwanya akaza kwigira ku karere ka Rwamagana, aho yazabasha guhura n’itsinda ry’abakozi bakamusangiza ubunararibonye ndetse bagasura n’imirenge. Meya Gasana Richard yahaye abandi bayobozi b’uturere ubuhamya bw’uko basuye Akarere ka Rwamagana, bajya gushyira mu bikorwa ibyo bahigiye kandi ko yabonye bidasaba ubushobozi buhambaye.

Icyumba ntangamakuru cya Rwamagana cyashyizweho mu rwego rwo kwihutisha icyemurwa ry’ibibazo byari bibangamiye abaturage (Human Security Issues) ndetse n’ishyirwa mu bikorwa ry’imihigo ubuyobozi bw’Akarere buba bwarasinyanye na Perezida wa Repubulika. Iki cyumba kandi kinafasha mu rwego rwo guhuza amakuru hagati y’inzego zose. Usibye iki cyumba, Mu karere ka Rwamagana haba n’amatsinda yihariye (Task forces) ashinzwe gukurikirana icyemurwa ry’ibi bibazo ku rwego rw’Akarere, umurenge n’Akagari.