Kuri uyu wa gatanu tariki ya 21/02/2019, Depite Dr Mbonimana Gamariel wo mu ihuriro ry'abagize inteko ishinga amategeko baharanira imibereho y'abaturage n'iterambere (RPRDP) yasuye Akarere ka Rwamagana agirana Ibiganiro n'ubuyobozi bw'Akarere ndetse n'izindi nzego zifite irangamimerere mu nshingano, abayobozi n'ibigo nderabuzima b'ibitaro. Ibiganiro byibanze ahanini ku: Ubuzima bw'imyororokere,Kwandikisha abana bavuka no gukura mu bitabo abapfuye, mu rwego rw'ubuvugizi no kubishyira mu mihigo, Gusobanurira Urubyiruko ya Ndi Umunyarwanda mu rwego rwo gukumira no kurwanya ingengabitekerezo ya Jenoside.

Visi Meya Mudaheranwa Regis Yagaragaje uburyo Ubuyobozi bw'Akarere ka Rwamagana bwafashe iya mbere mu gushishikariza Abaturage Kwandikisha abana bose bavuka, Dore ko biri no mu mihigo ubuyobozi bw'Akarere bwasinyiye imbere ya Perezida wa Repubulika muri uyu mwaka wa 2018/2019. Yagarutse ku ngamba zitandukanye zashyizweho mu rwego rwo guhuza Amakuru n'abashinzwe irangamimerere mu mirenge ndetse n'abakozi b'ibitaro n'ibigo nderabuzima. Ikindi ni uko abaturage bahawe telefoni itishyurwa yo gutangiraho Amakuru no kubarizaho ibibazo mu gihe batahawe serivisi nziza uko bikwiye. Ku bijyanye no kuboneza urubyaro. Yanagarutse ku ngamba zifashishwa mu gufasha abaturage kubona serivisi zo kuboneza urubyaro Zirimo no kuzibaha bakimara kubyara. Ibi bikaba byarazamuye ubwitabire ku buryo bugaragara.

Depite Dr Mbonimana Gamariel yavuze ko Impamvu batinda ku buzima bw'imyororokere ari uko gahunda yo kuboneza urubyaro itaragera ku rugero igihugu cyifuza, kandi ko iyo umubyeyi abyaye abana benshi atabasha kubitaho uko bikwiye, akaba ari nayo ntandaro y'ibibazo bitandukanye birimo : guterwa inda z'imburagihe ku bangavu, imirire mibi, guta ishuli. Yasabye ubufatanye bw'inzego zose, mu kurwanya no gukumira inda z'imburagihe ziterwa abangavu kuko nabyo biri mu bitera ubwiyongere bukabije. Yasabye abashinzwe irangamimerere kurushaho gushishikariza Abaturage Kwandikisha abana bavuka ndetse no kwandukuza abapfuye kugira ngo igihugu kigire Abaturage bazwi kandi bifashe mu igenamigambi.

Nyuma yo kuganira n'ubuyobozi bw'Akarere ndetse n'izindi nzego zifite irangamimerere na serivisi z'ubuzima n'ubuvuzi mu nshingano, Depite Dr Mbonimana Gamariel na bagenzi be basuye ibigo by'amashuri bya G. S Karenge, G. S Marie Reine de la paix na APAGIE Musha, mu rwego rwo kubaganiriza kuri gahunda ya Ndi Umunyarwanda. Biteganyijwe ko kuri uyu wa gatandatu, aba badepite bazifatanya n'abaturage mu bikorwa by'umuganda rusange usoza ukwezi kwa kabiri 2019.