Kuri uyu wa 18Nyakanga 2025 abadepite Hon. Uwiringiyimana Philbert na Hon. Izere Ingrid bagize Komisiyo y'Ubumwe bw'Abanyarwanda,Uburenganzira bwa Muntu no Kurwanya Jenoside bagiranye ibiganiro n’Ubuyobozi bw'Akarere n’abafatanyabikorwa mu nama ku ishyirwamubikorwa rya Politiki y'Igihugu y'Ubumwe n'Ubwiyunge yo muri 2020.

Aba badepite bagaragarijwe ishusho y'uko Akarere n'abafatanyabikorwa mu gushyira mu bikorwa Politiki y'Igihugu y'Ubumwe n'Ubwiyunge ihagaze, imbogamizi zihari n'ibyifuzo-nama mu kurushaho gusigasira ubumwe n'ubudaheranwa by'Abanyarwanda, uko Akarere gategura abarangije ibihano ku cyaha cya Jenoside yakorewe Abatutsi gusubira mu buzima busanzwe no kubana neza n'abo basanze, uko Akarere gategura umuryango nyarwanda muri rusange n'abarokotse Jenoside yakorewe Abatutsi by'umwihariko kwakira abarangije ibihano no kongera kubana nabo.

Nyuma y'ibi biganiro, abadepite basuye itsinda ritangirwamo inyigisho z'isanamitima muri gahunda ya "Mvura Nkuvure" n'umuryango w'uwarokotse Jenoside yakorewe abatutsi mu Mirenge ya Mwulire na Fumbwe hagamijwe kubona amakuru y'inyongera ku ruhare rw'inzego z'ibanze n'abafatanyabikorwa barimo inzego za Sosiyete Sivile, iz'abikorera n'Umuryango nyarwanda muri rusange mu gusigasira ubumwe n'ubudaheranwa bw'abanyarwanda.