Kuri uyu wa 28 Gicurasi 2025 Umuyobozi w'Akarere Bwana Mbonyumuvunyi Radjab ari kumwe n'abandi bayobozi yakiriye itsinda ry'abadepite riyobowe na Hon. Mukabalisa Germaine, baje gusura abaturage mu Karere hagenzurwa imitangire ya serivisi mu nzego z’ibanze, abagaragariza ishusho rusange y'uko Akarere kakemuye ibibazo by'abaturage birimo n'ibyagejejwe ku badepite mu ngendo ziheruka.

Aba badepite bazasura abaturage bo mu Karere , bakurikirane ibimaze kugerwaho mu mitegekere y'inzego z'imitegekere zegerejwe abaturage mu guha serivise nziza abaturage  mu gikorwa bazageza kuwa 04Kamena 2025. Muri izi ngendo, abadepite bazasura ahatangirwa serivise ku rwego rw'Umurenge; harimo serivise z'ubutaka n'imyubakire, ibiro bishinzwe irangamimerere n'izitangirwa mu ikoranabuhanga rya Irembo basuzuma niba serivise zitangwa mu buryo bunoze, uko zifasha abazikeneye n'uko byorohera abaturage kuzigeraho.

Abadepite kandi bazagirana ibiganiro n'abaturage ku ngingo zijyanye n'ubumwe n'ubudaheranwa bw'Abanyarwanda, gukemura amakimbirane, imitangire ya serivise ndetse n'inshingano mboneragihugu Abanyarwanda basangiye mu iterambere ry'Igihugu.

Tariki ya 31 Gicurasi 2025 aba badepite bazifatanya n'abaturage mu bikorwa by'Umuganda rusange usoza ukwezi kwa Gicurasi. Ku rwego rw'Akarere uyu muganda uzabera mu Murenge wa Fumbwe, mu Kagari ka Nyagasambu.

Iki gikorwa cy'ingendo z'abadepite kirashimangira inshingano y'Inteko Ishinga Amategeko ijyanye no kugenzura ibikorwa bya Guverinoma no gushyigikira imiyoborere idaheza kandi ishyira umuturage ku isonga, bigira uruhare mu kwihutisha ishyirwamubikorwa ry'intego za Gahunda y'Igihugu yo kwihutisha iterambere-NST2 n'Icyerekezo 2050.