Kuri uyu wa mbere tariki ya 13 Ukuboza 2021, Meya Mbonyumuvunyi Radjab, Visi Meya Nyirabihogo Jeanne d’Arc ushinzwe iterambere ry'ubukungu na Visi Meya Umutoni Jeanne ushinzwe iterambere ry'imibereho myiza y'abaturage mu karere ka Rwamagana; basuye Umurenge wa Gishali baganira n'abayobozi bawo kuva ku rwego rw'Umurenge kugera ku isibo. Nk’uko byasobanuwe n’Umuyobozi w’Akarere ka Rwamagana, Bwana Mbonyumuvunyi Radjab, intego y'uru ruzinduko rwa komite nyobozi mu murenge wa Gishali yari iyo kugira ngo nk'Abayobozi bahuze icyerecyezo cy'aho bashaka gukura umuturage n'aho bashaka kumugeza mu iterambere ryaba iry'ubukungu n’iry'imibereho myiza. Ibi biganiro bikaba byitabiriwe n’abagize inama njyanama y’umurenge, abakozi b’umurenge, abagize biro z’inama njyanama z’utugari, abakuru b’imidugudu n’abayobozi b’amasibo. Hitabiriye uhagarariye abayobozi b’amadini n’amatorero, uhagarariye abayobozi b’ibigo nderabuzima, uhagarariye ibigo by’amashuri ndetse n’abahagarariye inzego z’umutekano.

Mu butumwa bagejeje kuri aba bayobozi, Visi Meya Umutoni Jeanne ushinzwe iterambere ry'imibereho myiza y'abaturage yabasabye ubufatanye mu gucyemura ibibazo bibangamiye imbereho myiza n'umudendezo by'abaturage, kandi ababwira ko ubuyobozi butifuza kubona hari umwana ugaragaraho imirire mibi mu murenge wa Gishali. Kugira ngo ibyo bigerweho, Visi Meya Umutoni Jeanne yabasabye kwifashisha ibikoni by'umudugudu kugira ngo abana bakurikiranwe umunsi ku wundi; Igikoni cy'umudugudu ntigikore ari uko habonetse umwana wagaragayeho imirire mibi gusa, kuko uko bapima abana, uko bigisha ababyeyi gutegura indyo yuzuye, byose bifasha mu gukurikirana imikurire yabo no kubitaho uko bikwiye. Yunganiwe kandi na Visi Meya Nyirabihogo Jeanne d’Arc nawe wasabye aba bayobozi ubufatanye mu kwesa imihigo yaba ijyanye n'iterambere ry'ubukungu, iy'imibereho myiza y'abaturage ndetse n'ijyanye no kwimakaza imiyoborere myiza; kuko yose igamije guteza imbere umuturage, kandi intego ni uko umuturage aza ku isonga rya byose.

Meya Mbonyumuvunyi Radjab yabwiye aba bayobozi ko icyizere Abaturage babatoye babafitiye, arinacyo ubuyobozi bw'Akarere bubafitiye. Yabibukije ko mu karere ka Rwamagana abayobozi baho bose ari ikipe imwe kandi no mu mikorere basanzwe bakora nk'ikipe imwe; bityo ko nibakomeza gukorera hamwe, Akarere ka Rwamagana kazahora ku isonga. Meya Mbonyumuvunyi yashimiye abaturage n’abayobozi b’Umurenge wa Gishali ko bakunze kuza ku isonga mu mihigo, haba mu gutanga umusanzu w'ubwisungane mu kwivuza #mituweli ; kwizigamira muri gahunda ya #EjoHeza, n'indi mihigo; abasaba gukomereza aho ntibasubire inyuma, kandi abizeza ubufatanye. Yabasabye by’umwihariko kwita ku gucyemura ibibazo by'abaturage kuko atifuza ko Abaturage bategereza gucyemurirwa ibibazo n'umukuru w'igihugu kandi bafite ubuyobozi bubegereye; abasaba ko mu byo bakora byose umuturage agomba kubanza. Asoza ijambo rye, Meya Mbonyumuvunyi Radjab yasigiye aba bayobozi umukoro wo gukora isesengura, buri wese akareba aho asanze Abaturage ayoboye n'urwego ahagarariye; kandi akiha n’intego y'aho yifuza kuzabageza mu myaka itanu ya manda yatorewe.