Raporo y'igihembwe cya Q3 cy'umwaka w'Imihigo 2024/2025 igaragaza ko umubare munini w'abahinzi n'aborozi bamaze kumenya gahunda ya “Teka Urishingiwe” Muhinzi-Mworozi; aho bigaragara ko  hamaze kwishingirwa ibigori biri ku buso bungana na Ha 311, umuceri ku buso bungana na Ha 846, urusenda kuri hegitari 11, ibishyimbo kuri Ha 69 hegitari 1y'imiteja, inka 1,925, inkoko31,091 n'ingurube 516

Kuri uyu wa 29/4/2025 Umuyobozi w'Akarere wungirije ushinzwe Iterambere ry'Ubukungu Bwana Richards Kagabo Rwamunono yafunguye amahugurwa agamije kongera ubukangurambaga mu bahinzi n'aborozi kuri gahunda ya Leta y'ubwishingizi bw'ibihingwa n'amatungo ya "Tekana Urishingiwe" Muhinzi-Mworozi, ifite nkunganire ya Leta ingana na 40% by'ikiguzi cy'ubwishingizi.

Aya mahugurwa yateguwe ku bufatanye n'Ikigo cy'Igihugu gishinzwe Ubuhinzi n'Ubworozi,RAB, yitabiriwe n'abakozi bashinzwe ubuhinzi, abashinzwe ubworozi, abafashamyumvire b'ubuhinzi n'ab'ubworozi, abahinzi ntangarugero n'aborozi ntangarugero bahagarariye abandi mu mirenge, abayobozi b'amakoperative y'ubuhinzi n'ay'ubworozi hamwe n'abakozi bahagarariye sosiyete zitanga ubwishingizi bw'ibihingwa n'amatungo.

Muri uyu mwaka w'Imihigo 2024/2025 Akarere kahize kwinjiza mu bwishingizi bw'ibihingwa birimo; ibigori kuri hegitari400, umuceri kuri hegitari 840, Ha 10 z'urusenda,
hegitari 30 z'ibishyimbo
na Ha 1 y'imiteja. Mu matungo hahizwe kwishingira inka 2,500, inkoko 15,000 n'ingurube 500.

Umuyobozi w'Akarere wungirije ushinzwe iterambere ry'ubukungu yasabye abafashamyumvire n'abandi bafatanyabikorwa mu buhinzi n'ubworozi kwegera abahinzi n'aborozi bakarushaho kumenya iyi gahunda y'ubwishingizi bw'ibihingwa n'amatungo kuko bigaragara ko hari bamwe yagiye igoboka nyuma yo gushumbushwa igihe bahuye n'ibiza byashoboraga kubatera ibihombo mu mwuga bakora. yagize ati: “Leta y'u Rwanda izirikana uruhare rwanyu mu kwihaza mu biribwa ari na yo mpamvu yashyizeho Nkunganire no mu bwishingizi bw'ibihingwa n'amatungo kugira ngo hatagira umuhinzi cyangwa umworozi ucibwa intege n'igihombo yaterwa n'ibiza cyangwa ibyago byakwibasira ubuhinzi cyangwa ubworozi bwe”.

Mu rwego rwo gushyira mu bikorwa gahunda ya Guverinoma y’imyaka irindwi na Gahunda ya 4 yo kuvugurura ubuhinzi n’ubworozi (PSTA4), Leta y’u Rwanda ibinyujije muri Minisiteri y’ubuhinzi n’ubworozi ishyira mu bikorwa gahunda y’ubwishingizi bw’ibihingwa n’amatungo. Iyi gahunda yatangijwe ku mugaragaro kuwa 23 Mata 2019, ikaba kugeza ubu ikorera mu turere twose tw’Igihugu. Kugeza ubu, iyi gahunda ikora ku bihingwa birimo umuceri, ibigori, imiteja, urusenda, ibirayi, imyumbati, soya n’ibishyimbo naho ku matungo ikora ku nka , inkoko, amafi ndetse n’ingurube.