Kuri uyu wa kabiri tariki ya 27/08/2019, mu karere ka Rwamagana habereye igikorwa cyo kwiyamamaza ku bakandida senateri 9 bo mu ntara y’Iburasirazuba aribo: Mupenzi George, Bideri John Bones, Bagwaneza Theopiste, Nkurunziza Alexia, Rucyemanganizi Cyprien, ACP (Rtd) Ndahiro Joel, Mukandamage Marceilline, Mukeshimana Clotilde na Nsengiyumva Fulgence. Iki gikorwa kikaba cyari cyitabiriwe n’abagize inteko itora barimo: Abagize inama njyanama y’Akarere n’abagize biro z’inama njyanama z’imirenge 14 igize Akarere ka Rwamagana.

Visi Perezidante wa Komisiyo y’igihugu y’amatora, Madamu Mukamazela Rosalia yashimiye uburyo abakandida bitwaye muri iki gikorwa ndetse n’uburyo abanyarwanda muri rusange bamaze kugira umuco wo kwitwara neza mu matora. Yavuze ko komisiyo yamenyekanishije amatora y’abasenateri, uyu munsi hakaba hatangijwe igikorwa cyo kwiyamamaza ku bakandida senateri bazatorwa abasenateri 12 bazatorwa hashingiwe ku nzego z’imitegekere y’igihugu, iki gikorwa kikaba cyabereye mu ntara zose n’umujyi wa Kigali. Madamu Mukamazela Rosalia yasabye abakandida senateri ko mu gihe cyo kwiyamamaza bagomba kubahiriza amategeko n’amabwiriza agenga amatora kugira ngo amatora akomeze kugenda neza nta mbogamizi, cyane cyane bakirinda imvugo cyangwa imyitwarire iyo ariyo yose yahungabanya ubumwe bw’Abanyarwanda n’umutekano muri rusange.

Biteganyijwe ko amatora y’abasenatori azaba kuwa mbere tariki ya 16/09/2019. Muri aba bakandida senateri bahagarariye intara y’Iburasirazuba, hakaba hazatorwamo abasenateri 3 bahagararira iyi ntara.