Kuri uyu wa gatatu tariki ya 30/01/2019, Abasenateri bagize komisiye y’ububanyi n’amahanga, ubutwererane n’umutekano basuye Akarere ka Rwamagana mu rwego rwo kureba imikorere y’inganda nto zenga inzoga zikomoka ku bitoki. Abo ni Senateri Bishagara Kagoyire Therese, Senateri Uyisenga Charles, Senateri Mushinzimana Charles, Senateri Mukakalisa Jeanne d’Arc na Senateri Rugema Mike. Nk’uko byatangajwe na Senateri Rugema Mike wari uyoboye iri tsinda, intego y’uruzinduko rwabo yari ukureba ko izi nganda zikora zifite ibyangombwa by’ubuziranenge ndetse ko n'ibinyobwa zikora byujuje ubuziranenge kuko bikora ku buzima bw’abantu ndetse no ku mutekano wabo. 

Mu ijambo yagejeje kuri aba basenateri, Meya Mbonyumuvunyi Radjab yabagaragarije zimwe mu ngamba zafashwe n’ubuyobozi bw’Akarere mu rwego rwo guhashya burundu  no kurangiza   ibibazo  byakunze  kugaragara  mu nganda  zicuruza  ibinyobwa  bikomoka  mu bitoki. Muri izi ngamba harimo: Kugira  inama ba nyiri nganda no kuzisura  zose harebwa ko zujuje  ibyangombwa  bisambwa, Gukangurira  ba nyiringanda  guhagurukira  gushaka  ibyangombwa  byemewe n’Ikigo gitsura ubuziranenge (RSB), Kwita  ku isuku mu ruganda, Gukorana amasezerano (Contracts)  yanditse  n’abakozi bakoresha  mu nganda, Guhana  ba nyiri nganda bose batujuje ibisabwa n’amabwiriza yatanzwe, Kwita ku buzima bw’abakozi bakorera muri  izo nganda, Kwita ku buziranenge bw’inzoga nko kugira umukozi ubishinzwe  (Laborantin) ushinzwe gupima inzoga no  Kurwanya  inzoga  zose zikomoka  mu bitoki  zikorerwa  mu ngo  z’abaturage.

Bari kumwe n'ubuyobozi bw'Akarere ka Rwamagana ndetse n'abahagarariye inzego z'umutekano, Aba basenateri banasuye inganda 4 zenga inzoga mu bitoki harimo: AGASHYINGURACUMU  Ltd rwa Mutabaruka Diogene ruherereye mu murenge wa Muyumbu, INYEMEZABAHIZI   Ltd rwa Rusatira  Cassien na ISANGANIZABAGABO  Ltd rwa Habyarimana Gaspard ziherereye mu murenge wa Karenge ndetse na AKAHEBUJE  Ltd rwa Harerimana  Celestin ruherereye mu murenge wa Nyakaliro. Mu karere ka Rwamagana hose habarurirwa inganda zenga inzoga ikomoka ku bitoki zigera kuri 11. Murizo, eshatu zarafunzwe kubera kutuzuza ibisabwa, naho 8 zirakora.