Kuri uyu wa kane tariki ya 14/02/2019, itsinda ry’Abasenateri bagize komisiyo ya politiki n’imiyoborere mu nteko ishinga amategeko umutwe wa sena, baje mu karere ka Rwamagana mu rwego rwo kureba imiterere n’imikorere y’inama njyanama y’Akarere ka Rwamagana, uburyo ikorana n’izindi nzego, uburyo amahame remezo yubahirizwa mu miterere n’imikorere by’inama njyanama, imbogamizi abagize inama njyanama bahura nazo mu kurangiza inshingano zabo no gutanga inama n’uburyo zakurwaho. Iri tsinda ryari rigizwe na Hon. Senateri Tito Rutaremara na Hon. Senateri Kazarwa Gertrude ari nawe wari uriyoboye, bakaba bagiranye Ibiganiro n'abagize inama njyanama y'Akarere, komite nyobozi y'Akarere, abayobozi b'urugaga rw'abakorera mu karere, abayobozi b'imiryango itari iya Leta, abayobozi b'amadini n'amatorero. 

Perezida w'inama njyanama y'Akarere ka Rwamagana, Bwana Kabagamba Wilson, yagejeje kuri aba basenateri bimwe mu byo inama njyanama y’Akarere ka Rwamagana imaze gukora kuva yatorwa birimo: Inama zisanzwe 12/12(100%), Inama zidasanzwe 3, Inama z’Abaperezida 35/35 ( 100%), Inama za Komisiyo y’Imari n’Ubukungu 35/35(100%), Inama za Komisiyo y’Imiyoborere myiza 35/35(100%), Inama za Komisiyo z’Imibereho myiza 34/35(97%) n’inama za Komite Ngenzuzi 12/12( 100%). Bwana Kabagamba Wilson yavuze ko Inama Njyanama y’Akarere ka Rwamagana imaze gufata ibyemezo 216; kandi ko muri byo 186(86%) byashyizwe mu bikorwa ku kigero cy’100%, naho ibindi 30(14%) biracyashyirwa mu bikorwa. Mu rwego rwo kumenyekanisha ibyemezo by’inama njyanama, Bwana Kabagamba Wilson yavuze ko hifashishwa uburyo bwo kubishyira ku rubuga ntangamakuru (website) rw’Akarere, Gahunda yo gusura abaturage mu mirenge izwi ku izina rya “Njyanama mu baturage” (Njyanama outreach), Kumanika ibi byemezo ahabugenewe (noticeboard) ku rwego rw’Akarere, Umurenge, no ku Kagari; ndetse no kubitangaza mu nama zitandukanye zitabirwa n’abaturage ndetse na nyuma  y’imiganda. 

Hon Senateri Tito Rutaremara yashimiye imikorere y’inama njyanama y’Akarere ka Rwamagana ndetse yibutsa abajyanama ko inama njyanama ariyo shingiro ry’ihame ryo kwegereza ubuyobozi abaturage. Abasaba kongera inshuro basura abaturage muri gahunda yo kwegera abaturage yiswe “Njyanama Outreach”. Yabasabye kandi gukorana n’abayobozi b’amadini n’amatorero ndetse n’ibitangazamakuru mu rwego rwo kumenyekanisha ibyemezo by’inama njyanama kandi bakumvisha abaturage ko aribo bayoboye Akarere, ibyagezweho bakabyishimira n’ibitagenze neza bakumva ko babifitemo uruhare, amakosa ntibayashyire kuri Meya na komite nyobozi gusa. Hon Senateri Tito Rutaremara yasabye abagize inama njyanama y’Akarere ka Rwamagana gukomeza gukorana n’inama njyanama z’imirenge ndetse nazo bakazishishikariza gukorana neza n’iz’utugari. 

Inama Njyanama y’Akarere ka Rwamagana igizwe n’abajyanama 29 (Abagore  12 n’Abagabo 17). Muri aba harimo: Abajyanama rusange 15, Abagize biro y’inama y’igihugu y’urubyiruko 3, Uhagarariye abafite ubumuga 1, Umuyobozi w’Inama y’Igihugu y’abagore 1, Abagore 9 bagize 30%. Mu mikorere yayo, Inama Njyanama y’Akarere ka Rwamagana ikorera mu nzego 3 arizo: Biro y’Inama Njyanama, Komisiyo 3: (Komisiyo y’Imari n’Iterambere ry’Ubukungu, Komisiyo y’Iterembere ry’Imibereho myiza y’abaturage, Komisiyo y’Imiyoborere Myiza) na Komite Ngenzuzi. Inama njyanama igira inama isanzwe iterana inshuro 1 mu gihembwe n’inama idasanzwe iterana igihe cyose bibaye ngombwa. Igira kandi inama ya Biro, inama y’Abaperezida,  n’inama z’amakomisiyo ziterana buri kwezi n’igihe cyose bibaye ngombwa.  Inama za komite Ngenzuzi ziterana rimwe mu gihembwe n’igihe cyose bibaye ngombwa