Kuri uyu wa 20Mutarama2026 Umuyobozi w'Akarere Mbonyumuvunyi Radjab yakiriye itsinda ry'abasenateri rigizwe na Hon.Umuhire Adrie hamwe na Hon. Ngarambe Telesphore, basuye abaturage harebwa iterambere ry'ubworozi; basura imwe mu mishinga y’ubworozi bw’inka mu Karere n'uruganda rukora ibiryo by’amatungo rwa Prodev Ltd.

Mu Murenge wa Fumbwe hasuwe Rutaneshwa Salim worora inka z'amata 115 akaba afite n'inka ishobora kumuha litiro 37 ku munsi abikesha kuzigaburira neza. Uruganda rwa Prodev Ltd ruri mu Murenge wa Muhazi na rwo rukora toni 60,000 ku mwaka z'ibiryo by'inka,inkoko,ingurube n'amafi.

Kuri iki gicamunsi kandi iri tsinda ry'aba basenateri bifatanyije n'Ubuyobozi bw'Akarere n'abaturage b'Umurenge wa Munyiginya mu nteko z'abaturage zateraniye mu Kagari ka Binunga.

Muri izi nteko z'abaturage zanatangiwemo ibiganiro by'Itorero ry'Umudugudu; byibanze ku muco, indangagaciro na kirazira z'umuco nyarwanda, imiterere y'Inteko Ishinga amategeko, iterambere ry'ubworozi, abaturage bakangurirwa kwimakaza isuku hose n'abafite ibibazo babigeza ku bayobozi banafatanya kubikemura.