Mu kiganiro Rwamagana Mu Mihigo kuri Radio Izuba cyo kuri uyu wa 08 Gicurasi 2025 Umuyobozi w'Akarere Mbonyumuvunyi Radjab ari kumwe n'umuhuzabikorwa wa Croix Rouge mu Karere ka Rwamagana n'Umunyamabanga nshingwabikorwa w'Umurenge wa Mwulire bakoze ubukangurambaga bugamije gukumira no kurwanya ingaruka ziterwa n'ibiza muri iki gihe cy'imvura nyinshi.

Abaturage bakanguriwe kubahiriza amabwiriza bahabwa n'ubuyobozi bw'inzego zibegereye; abatuye ahateza ibiza bakahimuka by'agateganyo, kugenzura inzu batuyemo, gusibura inzira z'amazi no kuyarinda kwinjira mu nkuta, kuyobora amazi ahabugenewe bakayarinda kwishakira inzira, kwirinda kwambuka imigezi, ibiraro n'imihanda yuzuye amazi no gushishoza mbere yo kwambuka amateme ashaje n'imiyoboro y'amazi.

Mu gihe cy'ibiza, abaturage basabwe kutishora mu myuzure cyangwa inkangu, gucomokora ibikoresho bikoresha amashanyarazi kugira ngo bidateza izindi mpanuka, gutanga amakuru byihuse ku biza bibaye cyangwa aho bishobora guteza ibyago nk'imyuzure, inkangu, inkuba, n'ibindi no gufasha abafite intege nke kimwe n'abafite ubumuga kuva ahateza ibyago.

Mu Karere kose harabarurwa imiryango 1002 ituye ahantu hashyira ubuzima mu kaga irimo iyituye hafi y'aho bacukura amabuye, abatuye ku musozi ufite ubuhaname bukabije n'imiryango igituye hafi y'igishanga cya Gishore. Mu gihe haba habaye ibiza byibasira iyi miryango, mu buryo bw'agateganyo yakwimurirwa mu nsengero n'ibigo by'amashuri bihegereye.