Ku mugoroba wo kuri uyu wa 28Kanama 2025 mu kiganiro "Rwamagana mu Mihigo" kuri Radio Izuba hakozwe ubukangurambaga ku isuku n'umutekano, hagamijwe kwimakaza Isuku Hose n'Umudugudu utarangwamo icyaha. Abatumirwa muri iki kiganiro bari Bwana Rushimisha Marc, Umunyamabanga Nshingwabikorwa w'Umurenge wa Kigabiro, Umujyanama mu Nama Njyanama y'Umurenge n'Umukuru w'Umudugudu wa Kigega wo muri uyu Murenge.

Mu kiganiro, abatumirwa bagaragaje ibyakozwe muri ubu bukangurambaga bwatangiye mu kwezi kwa Gashyantare muri uyu mwaka, bashimira abaturage ku ruhare bagira mu isuku n'umutekano n'umusanzu batanga mu kwimakaza isuku n'umutekano aho batuye, banibutswa ko ibikorwa byo kwimakaza isuku n'umutekano bikomeje.

Abaturage b'Umurenge wa Kigabiro n'inshuti z'uyu Murenge bashimiwe uruhare bagize mu kugura imodoka izabafasha mu bikorwa by'isuku n'umutekano n'umusanzu batanga bikaba bifasha mu kwishyura irondo ry'umwuga no kugabanya ibyaha byakundaga kugaragara.

Abaturage bahamagaye mu kiganiro bashimye system ikoreshwa mu kwishyura irondo ry'umwuga ndetse bishimiye iyi modoka ije kubafasha kunganira ibikorwa by'isuku n'umutekano.