Kuri uyu wa 19 Kamena 2025 abagize Komite y'Akarere ishinzwe gahunda yo gufasha no guherekeza imiryango y'amikoro macye mu rugendo rwo kwikura mu bukene (graduation) bateranye, barebera hamwe ibimaze gukorwa mu guhuza imiryango 4,021 n'amahirwe kugira ngo yikure mu bukene,banafata ingamba kugira ngo intego y'umwaka igerweho.

Muri uyu mwaka wa 2024/2025 abaturage 3,624/4021 ni bo bamaze guhuzwa n'amahirwe barimo; 290 bigishijwe imyuga, 182 bahawe inka, 1,834 bahawe akazi muri VUP, 24 bubakiwe inzu, 126 bagurijwe igishoro, 562 bahabwa amatungo magufi, 208 bahabwa inyongeramusaruro, 56 bafashwa kwiga na 342 bafashirizwa mu matsinda yo kuzigama no kugurizanya.

Muri iyi nama kandi abayitabiriye biyemeje kwegera abafatanyabikorwa hirya no hino mu Karere kugira ngo batange akazi ku baturage b'amikoro macye kandi na bo bakangurirwe kubyaza umusaruro amahirwe bahujwe na yo kugira ngo bikure mu bukene. Aba baturage basinye amasezerano yo kwikura mu bukene mu gihe nibura cy'imyaka 2; irimo umwaka igihe cyo guhuzwa n'amahirwe no guherekezwa kugira ngo bikure mu bukene.