Ku gicamunsi cyo kuri uyu wa 20Kanama 2025 Murenge wa Rubona, Umuyobozi w'Akarere wungirije ushinzwe iterambere ry'ubukungu Bwana Richards Kagabo Rwamunono ari kumwe n'Umuyobozi wa WASAC/Ishami rya Rwamagana n'uhagarariye Ubuyobozi bwa Water For People bifatanyije n'abaturage b'Umurenge wa Rubona mu muhango wo gutaha ku mugaragaro Umuyoboro w'amazi wa Byimana Motorised WSS ureshya na Km 80.7, wakozwe ku bufatanye na Water For People mu Mushinga Isoko y'Ubuzima, ukaba ugeza amazi ku baturage 31,468 n'ibigo by'amashuri 13 mu Mirenge ya Mwulire, Nzige, Gahengeri na Rubona.

Umuyobozi w'Akarere wungirije ushinzwe iterambere ry'ubukungu yashimiye Water For People , WASAC n'abandi bafatanyabikorwa muri gahunda yo kwegereza abaturage amazi,asaba abaturage kubungabunga uyu muyoboro, kutangiza amasoko y'amazi no kwirinda kwangiza amazi. Muri uyu muhango kandi abakuru b'imidugudu basinye imihigo yo gufata neza ibikorwaremezo begerejwe no kwimakaza isuku n'isukura.

Mwubahamana Esperance wo mu Kagari ka Karambi,Rubona yavuze ko mbere yo kwegereza uyu muyoboro w'amazi bagiraga ikibazo cy'amazi macye cyangwa akabura kuko bari bafite ivomo rimwe ryakoreshaga imirasire y'izuba ariko ubu yegerejwe amazi mu rugo,bikanamworohera kuko afite ubumuga.

Icyiciro cya mbere cy'imirimo yo gukora uyu muyoboro w'amazi wa Byimana Motorised WSS cyatangiye mu mwaka w'ingengo y'imari 2023/2024, imirimo ikaba irangiye hafashwe amazi ku masoko 3. Hubatswe kandi ibigega 12 n'amavomo 49 byatwaye FRW 856,658,940.