Ku gicamunsi cyo kuri uyu wa 02Nzeli 2025 Guverineri w'Intara y'Iburasirazuba Hon Pudence Rubingisa yifatanyije n'Ubuyobozi bw'Akarere n'abaturage b'Umurenge wa Kigabiro mu nteko z'abaturage zahujwe no gutaha ku mugaragaro imodoka y'isuku n'umutekano aba baturage n'inshuti z'uyu Murenge biguriye muri gahunda bise "Isuku n'Umutekano ngizemo uruhare".

Abaturage b'Umurenge wa Kigabiro bashimiwe ku ruhare bagira mu bikorwa by'umutekano n'umusanzu wabo mu kwigurira imodoka yunganira irondo ry'umwuga. Umuyobozi wa Police mu Ntara ACP Innocent Kanyamihigo yabijeje ko na Police izakomeza kubaba hafi no kubashyigikira mu mutekano.

Guverineri w'Intara yashimiye abaturage b'Umurenge wa Kigabiro ku ruhare bagira mu gushyira mu bikorwa gahunda za Leta binashyira uyu Murenge ku isonga mu gukora neza, abakangurira kwitegura neza igihembwe cy'ihinga 2026A no guhinga ubutaka bwose bwatanga umusaruro.

Muri izi nteko zateraniye mu Kagari ka Nyagasenyi kandi, abaturage n'abafatanyabikorwa mu burezi bakanguriwe kwitegura neza itangira ry'amashuri, gukurikirana imyigire y'abanyeshuri n'imikorere y'ibigo by'amashuri bityo n'Intara y'Iburasirazuba ihore ku isonga mu burezi.

Abitabiriye inteko z'abaturage bakanguriwe kwiyandikisha muri sisiteme Imibereho (*195#) kugira ngo bifashe Igihugu mu igenamigambi, bibutswa ko tugiye gutangira Icyumweru cyahariwe kwimakaza ihame ry'uburinganire n'ubwuzuzanye harebwa ibipimo bifasha kubaka umuryango ushoboye.

Abaturage bitabiriye inteko kandi bahawe umwanya wo kugeza ku bayobozi ibibazo n'ibyifuzo byibanze ku kwishimira ko babonye imodoka izabafasha mu kwicungira umutekano, gahunda yasojwe n'ubusabane.