Kuri uyu wa gatanu tariki ya 04/03/2022, Abikorera bo mu karere ka Rwamagana bazindukiye mu gikorwa cy'amatora yo kwitorera abazabayobora mu rugaga rw’abikorera (PSF) ku rwego rw'Akarere muri manda izamara imyaka itatu(3). Aya matora akaba yabereye mu cyumba mberabyombi cyo mu rwunge rw'amashuri rwitiriwe Mutagatifu Aloyizi rw'i Rwamagana(G.S St Aloys Rwamagana); ayoborwa n’abakorerabushake ba Komisiyo y’igihugu y’amatora(NEC) ndetse akurikiranirwa hafi n’ubuyobozi bw’Akarere burangajwe imbere na Meya Mbonyumuvunyi Radjab, Visi Meya Nyirabihogo Jeanne d’Arc ushinzwe iterambere ry’ubukungu mu karere ka Rwamagana, Abahagarariye urugaga rw’abikorera ku rwego rw’intara n’urw’igihugu, Inzego z’umutekano, ubuyobozi bw’intara y’I Burasirazuba, ndetse n’abakozi b’urwego rw’igihugu rushinzwe ubugenzuzi ku iyubahirizwa ry’ihame ry’uburinganire n’ubwuzuzanye(GMO).

Hagendewe ku byavuye muri aya matora; Komite nyobozi yatowe igizwe na Bwana Mujyambere Louis de Monfort watowe nka Perezida w’urugaga rw’abikorera mu karere ka Rwamagana, Madamu Manirakiza Assoumpta atorwa nka Visi Perezida wa mbere(1), naho Madamu Ahayo Anitha we atorwa nka Visi Perezida wa kabiri(2). Hatowe kandi abayobozi ba buri huriro ku rwego rw’Akarere (15): ni ukuvuga 3 kuri buri huriro(ihuriro ry’abahinzi n’aborozi, ihuriro ry’abikorera bafite inganda, ihuriro ry’abikorera batanga serivisi, ihuriro ry’abikorera b’abacuruzi, n’ihuriro ry’ibyiciro byihariye ni ukuvuga abagore, abafite ubumuga n’urubyiruko); ndetse na komite nkemurampaka igizwe n’abantu barindwi(7).

Mu ijambo yagejeje ku batowe, Visi Meya Nyirabihogo Jeanne d’Arc ushinzwe iterambere ry’ubukungu mu karere ka Rwamagana yabashimiye ko bagiriwe icyizere ndetse bakanabyemera;  kuko izi ari inshingano z’ubwitange ziyongera ku mirimo yabo ya buri munsi bakoraga. Yongeyeho ko nk’ubuyobozi bw’Akarere ka Rwamagana bishimiye ko bungutse amaboko mashya, bityo bakaba babonye abo bagiye gufatanya guteza imbere aka karere n’abagatuye. Visi Meya Nyirabihogo Jeanne d’Arc  yakomeje avuga ko hari byinshi nk’ubuyobozi bifuza kugeraho, kandi ko ku bufatanye n’izi mbaraga nshya byose bizagerwaho. Yabijeje kuzakorana neza, bagafatanya kugira ngo Akarere ka Rwamagana gahore ku isonga mu mihigo, kandi kazamuke mu iterambere rirambye.