Kuri uyu wa 29/5/2023 Umunyamabanga uhoraho muri Minisiteri y'Ubuzima Bwana Zachée Iyakaremye n'abafatanyabikorwa ba Health Builders na Better World bifatanyije n'ubuyobozi bw'Akarere n'abaturage b'Imirenge ya Mwulire na Munyiginya mu muhango wo gufungura ku mugaragaro Ikigo Nderabuzima cya Mwulire.

Umuyobozi w'Akarere Bwana Mbonyumuvunyi Radjab yashimiye abafatanyabikorwa mu kwesa uyu muhigo barimo Health Builders na Better World ku nkunga yabo mu guteza imbere ubuzima bw’abaturage no kuba barafashije Akarere mu kubaka Ikigo Nderabuzima cya Mwulire.

Mu rwego rw'ubuzima, mu Karere ka Rwamagana dufite Ibitaro bya Rwamagana , Ibigo nderabuzima 16 harimo n’iki twatashye ku mugaragaro none, amavuriro y’ibanze 35; harimo 3 afite aho ababyeyi babyarira) n'abajyanama b’ubuzima 1882 mu Midugudu yose y'Akarere.

Umunyamabanga Uhoraho muri Minisiteri y’Ubuzima Bwana Iyakaremye Zachee yashimye ubuyobozi bw’Akarere ka Rwamagana kuba kesheje uyu muhigo ndetse n’abafatanyabikorwa kuko ibikorwa byabo bisobanura icyo bakora mu guteza imbere ubuzima. “Kuba mwarubatse iki kigo nderabuzima kigiye gutanga serivise zo kurengera ubuzima bw’abaturage kandi bakaba muri iyi si bafite ubuzima buzira umuze, bisobanuye ko nk’uko abanyarwanda babivuga, “Izina ni ryo muntu”. Leta y’u Rwanda izakomeza gukorana n’abafatanyabikorwa batandukanye mu guharanira ko abaturarwanda bagira ubuzima bwiza”.

Iki kigo Nderabuzima cya Mwulire giteganyijwe kwakira abaturage 33,936 batuye Umurenge wa Mwulire ndetse n’abandi bo mu tundi tugali twegereye iki kigo nderabuzima. Hari byinshi bimaze gukorwa ariko Ibitaro bya Rwamagana biracyakira umubare w'abarwayi benshi; barimo n'abaturuka mu Igororero rya Rwamagana ku buryo hakenewe kwagura Ikigo Nderabuzima cyo mu Igororero cyangwa Ikigo Nderabuzima cya Mwulire kigashyirwa ku rwego rwisumbuye.

Mu rwego rwo gushyira mu bikorwa Gahunda ya Guverinoma y’imyaka 7, Akarere gakomeje gushyira imbaraga mu kuzamura ibipimo by’ubuzima; kwegereza abaturage ibikorwa remezo by’ubuzima no kunoza imitangire ya serivise, guteza imbere ubuzima bw’umubyeyi n’umwana, kurwanya imirire mibi,gukangurira abaturage kwishyura umusanzu w'ubwisungane mu kwivuza no kurwanya indwara zitandura.