Kuri uyu wa mbere tariki ya 21 Gashyantare 2022, Ambasaderi Antoine Anfré uhagarariye u Bufaransa mu Rwanda ari kumwe na Christian Prudhomme uyobora “Tour de France” ndetse na Pierre Rolland ukinira ikipe ya B&B Hotels KTM(yo mu Bufaransa) yanitabiriye isiganwa rya “Tour du Rwanda 2022”; basuye abana bato batozwa umukino wo gutwara amagare mu kigo cy’urwunge rw’amashuri rwitiriwe Mutagatifu Aloyizi rw’I Rwamagana(G.S St Aloys Rwamagana). Muri uru ruzinduko,  aba bashyitsi bari bari kumwe n’umunyamabanga uhoraho muri Minisiteri ya siporo ariwe Bwana Shema Maboko Didier ndetse na Bwana Murenzi Abdallah uyobora Federasiyo y’umukino wo gusiganwa ku magare(FERWACY); bakaba bakiriwe na Meya Mbonyumuvunyi Radjab uyobora Akarere ka Rwamagana. Ibi bikaba byabaye nyuma y’uko hasojwe agace ka kabiri k’isiganwa rya “Tour du Rwanda 2022” kari katangiriye mu mujyi wa Kigari, kagasorezwa mu mujyi wa Rwamagana.

Bageze muri G.S St Aloys Rwamagana, aba bashyitsi bagaragarijwe abana bato biga muri iki kigo barimo gutozwa umukino wo gusiganwa ku magare(Cycling) binyuze mu mushinga ISONGA ushyirwa mu bikorwa ku bufatanye bwa leta y’u Rwanda n’igihugu cy’u Bufaransa. Aha kandi, Pierre Rolland(B&B Hotels KTM) yahise anagenera aba bana ibikoresho bazajya bifashisha igihe bitoza cyangwa bakina uyu mukino wo gusiganwa ku magare.
 
Pierre Rolland watanze impano y’ibikoresho yavuze ko yakunze cyane igihugu cy’u Rwanda kuva ku nshuro ya mbere ubwo yazaga gusiganwa mu irushanwa rya “Tour du Rwanda” ari nabyo byatumye yiyemeza kugaruka n’ikipe ye ya B&B Hotels KTM bakitabira “Tour du Rwanda 2022”. Yavuze ko ajya guhaguruka yiyemeje guhagurukana ibikoresho byo gufashisha abana nk’aba bafite impano, kandi ko yizeye neza ko umwaka utaha azagaruka, akazareba intambwe aba bana bazaba bamaze gutera kuko bamushimishije.
 
Mu ijambo yavugiye muri uru ruzinduko, Ambasaderi Antoine Anfré uhagarariye leta y’u Bufaransa mu Rwanda yavuze ko yishimiye kugera mu karere ka Rwamagana ku bw’umushinga Isonga ushyirwa mu bikorwa muri iki kigo cy’urwunge rw’amashuri rwitiriwe Mutagatifu Aloyizi rw’I Rwamagana hagamijwe gutahura no guteza imbere impano abana bafite mu mikino inyuranye. Akomeza avuga ko muri uyu mushinga, igihugu cy’u Bufaransa cyiyemeje kujya gitanga ubufasha mu bijyanye na tekiniki ndetse n’ibikoresho byifashishwa. Ambasaderi Antoine Anfré yongeyeho ko uru ruzinduko rufite irindi shingiro kuri Pierre Rolland wifuje gutanga impano y’ibikoresho byifashishwa mu gukina umukino wo gusiganwa ku magare, bigahabwa abanyeshuri bo muri G.S.St Aloys Rwamagana. Yavuze ko bitewe n’impano yabonye abanyeshuri bo muri iki kigo bafite by’umwihariko mu mukino wo gutwara amagare bamugaragarije, yizeye ko azahagaruka mu mezi ya vuba kugira ngo yongere abirebe kurushaho,

Umushinga ISONGA watangijwe mu kigo cy’amashuri mwaka ushize wa 2021, ukaba ufite intego yo guteza imbere siporo binyuze mu gutahura no guteza imbere impano abana bafite mu mikino inyuranye.