Mu ruzinduko yagiriraga mu Ntara y’Iburasirazuba kuri uyu wa 18 Nzeli 2025, Amb.Alfred Dombe w’Igihugu cya Angola mu Rwanda n'itsinda ayoboye bakiriwe na Hon. Guverineri w’Intara y’Iburasirazuba Pudence Rubingisa n'umuyobozi w'Akarere ka Rwamagana banasura ahakorera Ikigo Bella Flower Inc. gikorera ubuhinzi bw’indabo z’amaroza mu Murenge wa Muhazi, zikoherezwa ku isoko mpuzamahanga n’imbere mu gihugu.

Ikigo Bella Flower Inc. gihinga ubwoko 16 bw’indabo z’amaroza ku nkengero z’Ikiyaga cya Muhazi ku butaka bwa hegitari 100 mu Murenge wa Muhazi wo mu Karere ka Rwamagana, kikaba cyarahaye akazi abasaga 900 biganjemo urubyiruko, kikaba ari na cyo cyohereza indabo nyinshi kandi zifite ubuziranenge ku isoko mpuzamahanga.

Ambasaderi wa Angola mu Rwanda, H.E Alfred Dombe yashimye iterambere ry’ubuhinzi mu Rwanda kandi ko hari byinshi igihugu ahagarariye cya Angola n’icy’u Rwanda byakwigiranaho mu buhinzi, ubucuruzi, ubukerarugendo n’ibindi.

Intara y’Iburasirazuba mu Rwanda isanzwe ifitanye umubano n’Intara ya Cuanza Norte Province yo mu gihugu cya Angola bityo uru ruzinduko rwa ambasaderi wa Angola mu Rwanda rukaba rwari rugamije gukomeza uyu mubano no kurebera hamwe ibindi u Rwanda rwafatanyamo na Angola. 

Uruzinduko rwa Amb. Alfred Dombe rwasojwe n’igitaramo ndangamuco cyyanitabiriwe n’abayobozi b’Uturere tw’Intara y’Iburasirazuba twose ndetse hamurikwa umuco w’Igihugu cya Angola n’umuco w’u Rwanda binyuze mu bihangano n’imbyino gakondo ndetse hanatangwa impano ku mpande zombi.