Kuri uyu wa 22 Kamena 2025 ku rwibutso rwa Jenoside rwa Musha mu Karere ka Rwamagana,  Guverineri w'nItara Rubingisa Pudence, Abayobozi b'Uturere, inzego z'umutekano n'abandi batandukanye bifatanyije n'abagize urugaga rw'abikorera (PSF) bo mu Ntara y'Iburasirazuba mu gikorwa cyo kwibuka ku nshuro ya 31 abikorera bazize Jenoside yakorewe Abatutsi mu 1994.

Igikorwa cyo Kwibuka Abikorera bo muri iyi Ntara bazize Jenoside yakorewe Abatutsi mu 1994, cyabanjirijwe no gutaha inzu 4 abagize Urugaga rw'abikorera (PSF)  bo muri iyi Ntara basaniye abarokotse Jenoside batishoboye bo mu Murenge wa Fumbwe mu Karere ka Rwamagana. 

Umuyobozi w'Urugaga rw'abikorera mu Ntara, Nkurunziza Jean de Dieu yavuze ko muri uyu mwaka, abagize urugaga rw'abikorera (PSF) banoroje inka 85 imiryango y'abarokotse Jenoside itishoboye hirya no hino mu Ntara mu rwego rwo kwibuka Jenoside yakorewe Abatutsi mu 1994.

Guverineri Rubingisa Pudence yashimiye abagize urugaga rw'abikorera mu Ntara ku bikorwa byo kwibuka Jenoside yakorewe abatutsi mu 1994 no ku bindi bikorwa bakora bigamije gufatanya na Leta mu guteza imbere imibereho y'abarokotse Jenoside n'abaturage muri rusange.