Gishari: Abayobozi n’abaturage bibutse Abatutsi bishwe muri Jenoside, hanashyingurwa mu cyubahiro imibiri 16
Ku rwibutso rwa Jenoside yakorewe Abatutsi ruri I ruhande rw’ibiro by’umurenge wa Gishari, habereye umuhango wo kwibuka Imbaga y’abatutsi biciwe muri uyu murenge, abenshi muri bo bakaba bariciwe ku nyubako y’ibiro by’uyu murenge, icyo gihe bikaba byari ibiro bya Komini Muhazi; interahamwe zikaba zarahiciye Abatutsi benshi zibaziza uko baremwe. Umurenge wa Gishari ufite inzibutso ebyiri zirimo uruherereye mu kagari ka Ruhunda rushyinguyemo imibiri 5,081 ndetse n’uru rwo ku biro by’umurenge wa Gishari rushyinguwemo imibiri 1,080. Uyu munsi hakaba hashyinguwe n’indi mibiri 16 yavuye mu tugari tugize uyu murenge wa Gishari.
Mu buhamya bwatanzwe na Nyemazi Emmanuel yasangije abari aho inzira y’umusaraba yanyuzemo, uburyo ubuyobozi bubi bwariho icyo gihe aribwo bwateguye Jenoside bukanayishyira mu bikorwa, ndetse ashimira n’uburyo ingabo zari iza RPF zabarokoye. Nyemezi uvuga ko agifite isasu rikimurimo ryegereye impyiko, rikaba ari iryo bamurashe muri Jenoside, bityo yasoje asaba ko mu gihe haboneka inzobere mu buvuzi, ubuyobozi bwamufasha bakarimukuramo.
Meya Mbonyumuvunyi Radjab, Umuyobozi w’Akarere ka Rwamagana ari nawe wari umushyitsi mukuru muri uyu muhango, yahumurije abacitse ku icumu ababwira ko bafite ubuyobozi bwiza kandi n’abandi banyarwanda bagenzi babo bakaba barigishijwe. Meya Mbonyumuvunyi yanibukije abari aho ko kwibuka ari inshingano za buri Munyarwanda wese kubera ko Jenoside yakorewe Abatutsi ari amateka yacu nk’Abanyarwanda, kwibuka kandi bikaba ari uburyo bwo kwiga kugira ngo Jenoside itazongera kubaho ukundi, Bikaba binaduha umwanya wo kunamira Abacu bishwe mu gihe cya Jenoside tunabasubiza agaciro bambuwe ndetse tukanafata mu mugongo Abacitse ku icumu. Yagarutse ku bikorwa bitandukanye leta igenda ikora kugira ngo isigasire ubuzima bw’abacitse ku icumu birimo kubashakira amacumbi, kuvuza abafite ibikomere by’umubiri basigiwe na Jenoside yizeza abari aho ko bizakomeza kandi asaba buri wese ko yabigira ibye ndetse akabigiramo n’uruhare. Mu gusoza, Meya Mbonyumuvunyi akaba yasabye buri wese ufite amakuru y’ahaba hari umubiri w’uwishwe muri Jenoside yakorewe Abatutsi ko yayageza ku buyobozi bumwegereye kugira ngo iyo mibiri nayo ishyingurwe mu cyubahiro gikwiye ikiremwamuntu.
Uyu muhango wari witabiriwe kandi n’abahagarariye inzego z’umutekano, ubuyobozi bwa Ibuka ku rwego rw’Akarere ka Rwamagana, Abarokokeye mu murenge wa Gishari no mu nkengero zaho, Abafite ababo bazize Jenoside yakorewe Abatutsi baruhukiye mu nzibutso 2 ziri mu murenge wa Gishari ndetse n’abaturage b’uyu murenge muri rusange.