Ku gicamunsi cyo kuri uyu wa kabiri tariki ya 22 Gashyantare 2022, Guverineri CG Emmanuel Gasana uyobora Intara y’I Burasirazuba ari kumwe n’umuyobozi w’urwego rw’igihugu rw’ubugenzacyaha(RIB) muri iyi ntara, Bwana Rutaro Hubert, bifatanyije mu nteko rusange n’abaturage bo mu kagari ka Sibagire ho mu murenge wa Kigabiro/ Akarere ka Rwamagana. Iyi nteka yari yitabiriwe kandi na Visi Meya Nyirabihogo ushinzwe iterambere ry’ubukungu, Visi Meya Umutoni Jeanne ushinzwe iterambere ry’imibereho myiza y’abaturage ndetse n’abagize inama y’umutekano itaguye y’Akarere.

Mu butumwa yagejeje kuri aba baturage, Guverineri CG Emmanuel Gasana yababwiye ko mu nteko rusange z'abaturage haganirwa ku bintu bitandatu(6) by'ingenzi aribyo: Umutekano wacu nk'abaturage, imiyoborere myiza itubereye, iterambere ry'imiryango yacu n'iry'igihugu, imibereho myiza, kubaka ubufatanye no guhanga udushya. Yavuze ko abaturage b'Akarere ka Rwamagana hari ukuntu bazwi, hari ibikombe bitandukanye bagiye begukana ku bwo kwesa imihigo ndetse hari n'ibindi bazegukana kuko berekanye ko babishoboye; abasaba ko ibyo babyongeraho kunoza imiturire n'isuku mu mujyi wa Rwamagana. Guverineri CG Emmanuel Gasana yibukije abaturage ko iki gihugu cyabohowe n'urungano(urubyiruko); abasaba kuba maso bagafatanya n'ubuyobozi guhangana n'ibibazo byugarije urubyiruko(urungano) birimo; imirire mibi n'igwingira mu bana, guta ishuri kw'abana, inda ziterwa abana b'abangavu n'ubuzererezi mu bana.

Nyuma yo gufatanya n'ubuyobozi bw'Akarere ka Rwamagana ndetse n'abahagarariye inzego z'umutekano mu gutega amatwi abaturage no kubacyemurira ibibazo mu ruhame; Guverineri CG Emmanuel Gasana yasabye abaturage kujya bashyira mu bikorwa inama baba bagiriwe n’ubuyobozi, kandi asaba ko hatezwa imbere impano y'umukino wo gusiganwa Ku magare kuko bimaze kugaragara ko ari umwihariko w'Abanyarwamagana.