Mu gitondo cyo kuri uyu wa gatandatu tariki ya 09/10/2021, Guverineri w’intara y’iburasirazuba CG Emmanuel K. Gasana ari kumwe na CP Emmanuel Hatari uyobora polisi mu ntara y’iburasirazuba, yagiranye inama n’ubuyobozi bw’Akarere ka Rwamagana guhera ku rwego rw’Akagari kugeza ku rwego rw’Akarere ndetse n’inzego z’umutekano muri aka karere, ahatangiriza ubukangurambaga bw’isuku n’umutekano bufite insanganyamatsiko igira iti: “Haranira Akarere, Umurenge, Akagari, n’Umudugudu utekanye, uteye imbere kandi ufite isuku.”. Iyi nama ikaba yitabiriwe n’abagize komite nyobozi y’Akarere barangajwe imbere na Meya Mbonyumuvunyi Radjab, abanyamabanga nshingwabikorwa b’Imirenge 14 igize Akarere ka Rwamagana, Abanyamabanga nshingwabikorwa b’utugari 82 tugize aka karere ndetse n’abagize inama y’umutekano itaguye y’Akarere ka Rwamagana. Mu rwego rwo kwirinda icyorezo cya COVID-19 no gukumira ikwirakwira ryacyo, abitabiriye iyi nama babanje gupimwa ubwandu bwa Coronavirus kandi n’aho inama ibera hubahirizwa amabwiriza yo kwirinda iki cyorezo.

Mu ijambo ry’ikaze, Meya Mbonyumuvunyi Radjab yavuze ko ubuyobozi bw’Akarere ka Rwamagana bumaze iminsi bukora ubukangurambaga butandukanye mu rwego rwo kwimakaza umutekano n’imibereho myiza y’abaturage. Muri ubu bukangurambaga hakaba harimo: Ubukangurambaga ku mudugudu utarangwamo icyaha, aho hanahembwe Umurenge wa Gishali wabaye uwa mbere, ndetse n’ubukangurambaga bwa #Tujyanemo bwari bugamije kurengera abana barindwa ubuzererezi, ihohoterwa no gusambanywa, ndetse hanarwanywa ikoreshwa n’icuruzwa ry’ibiyobyabwenge. Meya Mbonyumuvunyi Radjab yavuze ko ubu bukangurambaga bwagenze neza kandi bugatanga umusaruro ufatika; ariko ko kubera ko hari ibigikenewe kunozwa mu isuku n’umutekano wo nkingi ya byose, ubuyobozi bw’Akarere bwiyemeje gutangiza ubundi bukangurambaga bw’isuku n’umutekano.

Umuyobozi wa Polisi mu ntara y’Iburasirazuba CP Emmanuel Hatari yibukije abitabiriye inama ko bagomba kongera imbaraga mu kubungabunga umutekano w’abaturage bayobora, bakarwanya ibyaha bikigaragara birimo ibiyobyabwenge n’ibiyoga by’ibikorano bitujuje ubuziranenge, ubujura, ihohoterwa rikorerwa mu ngo, gusambanya abana, ababyeyi batita ku bana babo,abarenza amasaha yo kuba bageze mu ngo muri iki gihe duhanganye n'icyorezo cya COVID-19, urugomo rujyana no gukubita no gukomeretsa kandi ibi bikagendana no kwimakaza isuku n’isukura aho bakorera, aho batuye, ku mubiri, ndetse no ku mihanda. yavuze ko kugira ngo ibi bigerweho, abayobozi bagomba kujya buzuza neza amakuru ikayi y'abinjira n'abasohoka, hagakoreshwa neza inzego zihari, abaturage bakabikangurirwa mu nteko rusange no mu mugoroba w'ababyeyi, kandi ubuyobozi bukagenzura ko amabwiriza agenga utubari yashyizweho na Minisiteri y'ubucuruzi (MINICOM) muri iki gihe duhanganye na COVID-19 ndetse n'amabwiriza ajyanye n'ibirori byo mu ngo yashyizweho na Minisiteri y'ubutegetsi bw'igihugu (MINALOC). CP Emmanuel Hatari yanasabye abitabiriye inama kurushaho kurwanya icyorezo cya COVID-19 no gukumira ikwirakwira ryacyo, bakagenzura ko amabwiriza yo kucyirinda yose yubahirizwa nk’uko bikwiye aho bayobora.

Mu butumwa yagejeje ku bitabiriye iyi nama, Guverineri w’intara y’iburasirazuba CG Emmanuel Gasana yashimiye Akarere ka Rwamagana uburyo gahora kesa imihigo, ashimira ubukangurambaga bumaze iminsi bukorwa, ndetse ahita atangiza ubukangurambaga bw’isuku n’umutekano. Guverineri CG Emmanuel Gasana  yavuze ko muri ubu bukangurambaga bw’isuku n’umutekano, ikigamijwe ari ukubona umuturage wese afite isuku ku mubiri mbere na mbere, akagira isuku mu rugo iwe, noneho isuku ikagera no mu mudugudu wose; kuko imidugudu yose nirangwa isuku bizatuma Utugari twose turangwa n’isuku, imirenge yose irangwe n’isuku ndetse n’Akarere kose muri rusange karangwe n’isuku. Yongeyeho ko Umujyi wa Rwamagana nk’umujyi uri mu marembo y’umujyi wa Kigali, ugomba kurangwa n’isuku igaragarira buri wese, kandi bikagendana n’umutekano. Guverineri CG Emmanuel Gasana yahise anatangiza amarushanwa ku isuku n’umutekano ku mirenge 14 igize Akarere ka Rwamagana, avuga ko imirenge 3 ya mbere izahembwa igahabwa ibikombe, za gihamya (certificates) ndetse n’amafaranga abiherekeza. Yasabye kandi abitabiriye inama ko n’ubwo muri iyi minsi imibare y’ubwandu bwa COVID-19 irimo kugabanyuka muri aka Karere, ariko ntawe ugomba kwirara, ahubwo tugomba gukomeza gushyira imbaraga mu kurwanya iki cyorezo dukurikirana iyubahirizwa ry’amabwiriza yo kukirwanya no kucyirinda. Yasoje asaba abitabiriye inama kuzakurikiranira hafi imigendekere myiza y’amatora kandi bagashishikariza ibyiciro byose by’abaturage kuzayitabira.