Kuri iki cyumweru tariki ya 12/05/2019, mu cyumba cy’inama cyo mu kigo cy’urubyiruko kizwi ku izina rya “Yego Center Rwamagana”, habereye inteko rusange y’urubyiruko rwo mu karere ka Rwamagana ihuzwa no gusoza imurikabikorwa ry’urubyiruko, aho rwagaragazaga bimwe mu bikorwa rukora mu rwego rwo kwiteza imbere no guteza imbere igihugu muri rusange. Muri iyi nteko rusange, Umuhuzabikorwa w’inama y’igihugu y’urubyiruko mu karere ka Rwamagana Bwana Kabagambe Godfrey yagaragaje ibyo urubyiruko rwagezeho muri uyu mwaka w’ingengo y’imari wa 2018/2019 ndetse n’aho rugeze rushyira mu bikorwa imihigo rwahize muri uyu mwaka.

Ku bufatanye n’abahagarariye inzego z’ubuyobozi ndetse n’abafatanyabikorwa batandukanye, hanatanzwe ibiganiro bitandukanye birimo: ikiganiro ku mahirwe ahari yafasha urubyiruko kwiteza imbere na gahunda ya NEP/ Kora wigire, ikiganiro ku ruhare rw’urubyiruko mu kurwanya ibiyobyabwenge, inda zidateganyijwe no guta amashuli ndetse n’ikiganiro ku ruhare rw’urubyiruko mu gusigasira ibyagezweho. Iyi nteko rusange yari yitabiriwe na bamwe mu badepite bahagarariye urubyiruko mu nteko ishingamategeko barimo Depite Kalisa Ernest na Depite Imaniriho Clarisse, Umuhuzabikorwa wungirije w’inama y’igihugu y’urubyiruko ku rwego rw’igihugu Bwana Rubwiriza Jean d’Amour n’Umunyamabanga wayo ariwe Bwana Mwesigwa Robert, Abagize komite nyobozi y’Akarere ka Rwamagana, abahagarariye inzego z’umutekano n’abafatanyabikorwa batandukanye barimo: SFH, Reseau des femmes, Ibitaro bya Rwamagana, IPRC Gishari, BDF n’abandi.

Mu butumwa bwahawe urubyiruko, Bwana Rubwiriza Jean D’amour, umuhuzabikorwa wungirije w’inama y’igihugu y’urubyiruko ku rwego rw’igihugu, yagaragarije urubyiruko amahirwe rukesha imiyoborere myiza ya leta y’ubumwe maze abasaba kuyabyaza umusaruro, bakagana ikigega cy’igihugu gitanga ingwate ku mishinga ibyara inyungu (BDF) bityo bakarushaho kwiteza imbere bo ubwabo, bakanateza imbere igihugu muri rusange. Yasabye urubyiruko kunoza imyitwarire yarwo mbere na mbere, rukabaho rugendera ku ndangagaciro na Kirazira by’umuco nyarwanda. Yabibukije kandi guhanga udushya hagamijwe kwiteza imbere no guteza imbere igihugu, kuko hari amafaranga igihugu cyateganyije yo gushyigikira urubyiruko ruzagaragaza imishinga y’iterambere ifite udushya duhiga utundi, nk’uko bikubiye muri gahunda ya leta y’imyaka 7 (2017-2024). Yabasabye kumva ko ibibazo bikururira bo ubwabo nk’urubyiruko, hari igihe biteza ingaruka no ku bukungu ndetse n’imibereho by’igihugu n’abagituye, bityo abasaba kwitwararika mu byo bakora byose.

Depite Imaniriho Clarisse wari umushyitsi mukuru muri iyi nteko rusange y’urubyiruko rwo mu karere ka Rwamagana, yashimiye urubyiruko ku ruhare rukomeye bagira mu iterambere ry’igihugu ndetse n’uruhare bagize mu matora yagiye akorwa mu byiciro bitandukanye. Yabasabye kubyaza umusaruro amahirwe bahawe n’igihugu, bakihangira imirimo bakora imishinga igaragaza udushya n’umwihariko, bakagira imyitwarire myiza, bakishyira hamwe mu makoperative kandi bakanoza ibyo bakora.