Kuri uyu wa kabiri tariki ya 07/05/2019, Mu cyumba cy’inama cya Yego Center-Rwamagana habereye igikorwa gushimira aborozi borojwe muri gahunda ya Girinka Munyarwanda bakaba baramaze kwitura no koroza bagenzi babo ndetse hanacutswa aborojwe inka kuva mu mwaka wa 2013 kugeza mu 2017. Iki gikorwa kikaba cyakozwe ku bufatanye bw’Akarere ka Rwamagana n’umushinga MSAADA ufatanya n’Akarere guteza imbere imibereho myiza y’Abarokotse Jenoside yakorewe Abatutsi mu 1994.

Mu buhamya bwatanzwe na Mukecuru Kabihogo Auleya ndetse na Muzehe Munyensanga Jean Damascene bagaragaje ko inka borojwe zabakuye mu bwigunge, zibamara irungu, zibafasha kurera abana babo kandi zinabafasha kwiteza imbere muri rusange. Bashimiye Perezida Kagame watangije gahunda ya Girinka ndetse n’umushinga MSAADA wayishyigikiye.

Dr Kanyandekwe Christine wari uhagarariye ikigo cy’igihugu gishinzwe guteza imbere ubuhinzi n’ubworozi (RAB) yashimiye umushinga MSAADA washyigikiye gahunda ya Girinka kandi ukaba utanga inka nziza zihaka, ndetse anashimira aborojwe ko babaye inyangamugayo bagafata neza inka borojwe bityo bakaba barituye Perezida Kagame wabagabiye, nabo bakoroza bagenzi babo. Yashimiye kandi ubuyobozi bw’Akarere ka Rwamagana uburyo gakorana neza n’abafatanyabikorwa harimo na MSAADA. Yabijeje ko igihugu gishinzwe guteza imbere ubuhinzi n’ubworozi (RAB) kizakomeza kubageza urukingo rw’indwara y’ikibagarira (East coast fever).

Visi Meya Umutoni Jeanne ushinzwe imibereho myiza y’abaturage mu karere ka Rwamagana, yongeye gushimira abarokotse Jenoside yakorewe abatutsi mu 1994 kuba baratanze imbabazi, bakongera bakiyubaka ntibaheranwe n’agahinda. Yanabashimiye kandi ko babaye intwari bakitura uwabagabiye nabo bakoroza abandi, abizeza ko n’ubwo bacukijwe, ariko inka zabo zizakomeza kwitabwaho n’abakozi b’akarere bashinzwe ubworozi mu mirenge. Yabasabye ko mu gihe inka yabo igize kibazo icyo aricyo cyose, bagomba kubimenyesha ubuyobozi bubegereye, kigacyemurwa. Nyuma yo kumva ubuhamya bwabo, Visi Meya Umutoni Jeanne yasabye aba borzoi ko abumva barateye imbere, bakaba bumva baravuye mu kiciro bari barimo mbere, bazandika basaba guhindurirwa ibyiciro kuko hari aho bavuye hari n’aho bageze.

Kuva MSAADA Itangiye gukorera mu karere ka Rwamagana na Kayonza mu mwaka wa 2013, imaze gutanga inka ku miryango 379 y'abarokotse Jenoside yakorewe Abatutsi mu 1994. Iyi miryango yose hamwe ikaba igizwe n’abantu 1085. Izi nka zikaba zaragize uruhare rukomeye mu kurwanya imirire mibi, guteza imbere imiryango mu buryo butandukanye no kuyikura mu bwigunge. MSAADA ikaba yijeje aborozi bacukijwe ko izakomeza kubavurira inka ku buntu, gusa bakigurira imiti ikenewe.