Kuri uyu wa Gatanu tariki ya 25 Gashyantare 2022, mu cyumba mberabyombi cyo mu rwunge rw’amashuri rwitiriwe Mutagatifu Aloyizi rw’I Rwamagana habereye ibirori byo gusoza ku mugaragaro icyumweru cyahariwe ubukangurambaga #NanjyeNdashoboye bwari bugamije kurengera abana bafite ubumuga. Umushyitsi mukuru muri ibi birori akaba yari Dr Nyirahabimana Jeanne Umunyamabanga nshingwabikorwa w’intara y’I Burasirazuba. Ibi birori byari byitabiriwe kandi na Meya Mbonyumuvunyi Radjab uyobora Akarere ka Rwamagana, Bwana Nkurayija Marcel umukozi w’inama y’igihugu y’abafite ubumuga(NCPD), Visi Meya Umutoni Jeanne ushinzwe iterambere ry’imibereho myiza y’abaturage, abahagarariye inzego z’umutekano, abafatanyabikorwa bafatanya n’ubuyobozi mu kurengera no guteza imbere abafite ubumuga, abahagarariye abafite ubumuga mu byiciro bitandukanye, n’abandi.
 
Mu ijambo ry’ikaze, Meya Mbonyumuvunyi Radjab yavuze ko mu gufasha abafite ubumuga kugera ku intego, igikuru ari ukumenya ngo hakenewe iki ngo wa muntu wacu ufite ubumuga abashe kuzuza inshingano ze, kandi ko iyo tumaze kumushakira inyunganirangingo cyangwa se insimburangingo, nta kabuza ariga, agakora akiteza imbere. Meya Mbonyumuvunyi Radjab  yakomeje avuga ko mu karere ka Rwamagana bamaze kubona ibibazo bitandukanye abafite ubumuga bahura nabyo, nibwo bateguye bukangurambaga #NanjyeNdashoboye ., butangirizwa mu murenge wa Muhazi kuwa gatanu ushize tariki ya 18/02/2022, bukaba bwasorejwe mu murenge wa Kigabiro uyu munsi. Ubu bukangurambaga #NanjyeNdashoboye bukaba bwari bugamije kurengera abana, ariko by'umwihariko tugahera Ku bana bato bafite ubumuga, kuko nibura abakuru bo hari aho bashobora no kwivugira bagaharanira uburenganzira bwabo. Meya Mbonyumuvunyi akaba yavuze ko muri iki cyumweru ubuyobozi bwashyize imbaraga mu bintu bibiri by'ingenzi aribyo: kumenya abana bafite ubumuga n'aho baherereye, no kumenya ngo bakeneye iki ngo ubuzima bukomeze bazamukire rimwe n'abandi. Ikizakurikiraho kikaba ari ukubafasha mubicyenewe. Yasabye buri wese kurwanya ihezwa n'akato bikorerwa abana bafite ubumuga, ndetse n'amazina abatesha agaciro; tugaharanira uburenganzira bwabo.

Dr Nyirahabimana Jeanne, Umunyamabanga nshingwabikorwa w’intara y’I Burasirazuba wari umushyitsi mukuru muri ibi birori yashimiye ubuyobozi bw’Akarere ka Rwamagana bwateguye ubu bukangurambaga ndetse na buri wese wagize uruhare mu migendekere myiza yabwo.  Yashimiye kandi n'umuntu wese witabiriye iki gikorwa cyo kongera kwibutsa abantu bose ko abana bafite ubumuga baba bafite uburenganzira nk'abandi bana bose. Dr Nyirahabimana Jeanne  yongeyeho ko mu ntara y'i Burasirazuba bishimira ko batangije ubukangurambaga bwo kurengera abana muri rusange, ariko ashimira Akarere ka Rwamagana ku mwihariko wako kongeyeho wo kurengera abana bafite ubumuga; avuga ko Umwana ufite ubumuga ari umwana nk'abandi, ari umwana wo kwitabwaho, afite uburenganzira bwo kwambikwa, kuvuzwa, kugaburirwa, kwiga, gukora, kandi afite n'uburenganzira bwo gukundwa no gukunda.