Mu nama yabereye mu cyuma cy’inama cya St Augustin iherereye mu murenge wa Kigabiro, hasorejwe ikiciro cya mbere cy’umushinga “Jersey inka nziza” w’umuryango Send a cow. Uyu mushinga ukaba ugamije ahanini kuvugurura amatungo no kongera umusaruro w’ibikomoka ku mata, haterwa intanga z’inka za Jersey ndetse hanashyigikirwa n’abatangiye korora inka za Jersey kugira ngo n’abandi babarebereho. Inka za Jersey ngo kubera ko ari nto, n’igifu cyazo kugihaza ibyatsi ntibigorana. Mu karere ka Rwamagana, Umushinga “Jersey inka nziza” ukorera mu mirenge ya Rubona, Muyumbu, Munyaga, Gishari na Gahengeri. Ikiciro cyasojwe kikaba cyaratangiye mu mwaka wa 2013.

Kanakuze Valens umuhuzabikorwa w’Umushinga “Jersey Inka Nziza”, akaba yavuze ko bishimira ko inka bateye intanga za Jersey zafashe ku ijanisha rya 66% bivuye kuri 51%. Madamu Angelique Barongo uhagarariye umuryango wa Send a Cow, yashimiye ubuyobozi bw'imirenge bakoreyemo ku mikoranire myiza bagiranye ari nabyo byatumye Iyi gahunda igera ku ntego zayo. Yavuze ko uburyo ikiciro cya mbere cyagenze byatumye, abaterankunga biyemeza gutangiza ikiciro cya kabiri cy’umushinga “Jersey Inka nziza”. Akaba yavuze ko hari icyizere ko n'ibyiciro bindi bizaza Bitewe n'uko ubuyobozi bw'Akarere ka Rwamagana bukorana neza n'umushinga.

Mu bikorwa biteganyijwe gukorwa mu gihe cya vuba harimo: Ubukangurambaga ku kumenya inka za Jersey, Umunsi w’imurikabikorwa uzwi nka “Send a Cow Day” uzabera mu karere ka Rulindo,aho yasabye ubuyobozi bw’Akarere ka Rwamagana kuzawitabira.

Meya Mbonyumuvunyi Radjab yashimiye umuryango Send a Cow uburyo ufatanya n'Akarere ka Rwamagana mu guteza imbere Abaturage batuye aka karere. Yababwiye ko inka za Jersey n’ubwo zifite umubyimba muto ariko zigira umusaruro mwinshi, bityo abasaba ko bishobotse mu mirenge 5 bakoreramo bazayongera ikagera ku 10 cyangwa se bakaba banakorera no mu mirenge yose yo mu karere ka Rwamagana uko ari 14. Yabijeje ko muri iki cyiciro cya kabiri gitangiye, Akarere ka Rwamagana kazakomeza gukorana neza n'uyu mushinga ku buryo, iki cyiciro kizarangira Akarere ka Rwamagana kakiri ku isonga mu mikoranire myiza no mu gufasha uyu mushinga kugera ku ntego.

Mu ntangiro z’uyu mwaka wa 2019, Imibare y’Ikigo k’Igihugu RAB yagaragazaga ko inka mu Rwanda zigera kuri miliyoni 1,29 muri rusange, inyarwanda ni 41% izivanze (Frizone, Jersey n’izindi) zigera muri 40% mu gihe inka zitwa iz’ ‘inzungu’ zuzuye (100% mu maraso yazo) zigera kuri 19%.