Ku gicamunsi cyo kuri uyu wa 09 Nzeli 2025 mu Mirenge yose y'Akarere hateranye inteko z'abaturage zatangirijwemo icyumweru cyahariwe ibikorwa bigamijwe kwimakaza ihame ry'uburinganire, ku nsanganyamatsiko igira iti: "Ihame ry'uburinganire, inkingi y'imiyoborere myiza n'iterambere ridaheza kandi rirambye". Umuyobozi w'Akarere Bwana Mbonyumuvunyi Radjab n'abandi bayobozi bifatanyije n'abaturage b'Umurenge wa Muyumbu, ahanasezeranye imiryango 19.

Ibikorwa by'iki cyumweru  bizibanda ku kuganiriza no gusezeranya imiryango yabanaga bitemewe n'amategeko, gusubiza abana ku ishuri,  guha ubutabera abangavu batewe inda, kwandika abatanditse mu bitabo by'iranagamimirere, kuremera imiryango no kuganiriza ibana mu makimbirane, gutanga ibiganiro ku burenganzira bw'umwana, hakorwe ubugenzuzi mu bigo by'amashuri harebwa ko abana bose bageze ku ishuri no gukomeza kwibutsa ababyeyi batarajyana abana ku ishuri kubasubizayo, kurwanya imirire mibi n'ibindi.

Umuyobozi w'Akarere yibukije abaturage ko umuryango ari wo shingiro ry'Igihugu bityo ko abawugize bakwiye kubana byemewe n'amategeko, bakagira umuryango utekanye kandi ushoboye kuko ari na bwo uzatera imbere, bigizwemo uruhare na buri wese mu bawugize.

Icyumweru cyahariwe kwimakaza ihame ry'uburinganire cyatangijwe none kizasozwa tariki 19Nzeli 2025, kikaba gifite insanganyamatsiko igira iti:"Ihame ry'uburinganire, inkingi y'imiyoborere myiza n'iterambere ridaheza". Biteganyijwe ko iki cyumweru kizarangira imiryango 150 yabaruwe ko ibana itarasezeranye byemewe n'amategeko izegerwa, ikigishwa ikanasezerana byemewe n'amategeko.

Muri izi nteko, abaturage bibukijwe kujyana ku ishuri abana bose bagomba kwiga, guhinga ubutaka bwose bushobora gutanga umusaruro muri iki gihembwe cy'ihinga 2026A, baganirizwa ku kamaro ka Mituweli ndetse hakirwa ibyifuzo n'ibibazo by'abaturage bafatanya n'abayobozi kubikemura.