Kuri uyu wa mbere tariki ya 05/08/2019, mu busitani bw’umurenge wa Kigabiro hatangirijwe ku mugaragaro icyumweru cyahariwe irangamimerere. Muri iyi gahunda, abaturage basobanuriwe serivise z’irangamimerere ndetse babaza bimwe mu bibazo bibazaga. Hakozwe kandi ibikorwa bitandukanye birimo: kwandikisha abana bavutse baba abavutse vuba aha n’abari baracikanywe ntibandikishwe, kwandukuza abitabye Imana, kwifotoza ku bagejeje imyaka yo gufata ikarita ndangamuntu, n’ibindi.

Visi Meya Umutoni Jeanne wari umushyitsi mukuru muri iyi gahunda, yibukije abaturage ko igenamigambi ry’igihugu rishingira ku mibare nyayo y’abagituye bityo asaba abaturage kwitabira iyi gahunda. Yababwiye ko muri iki cyumweru nta rwitwazo ruhari kuko serivise z’irangamimerere nyinshi ari ubuntu. Yongeyeho ko muri serivise zizajya zitangirwa ubuntu harimo: kwandikisha abana, kwandikisha abapfuye no gushyingirwa byemewe n’amategeko. Visi Meya Umutoni Jeanne yashishikarije abaturage bakibana mu buryo butemewe n’amategeko kwihutira gushyingirwa mu buryo bwemewe n’amategeko kuko ariyo nzira yo kurwanya no kwirinda amakimbirane yo mu ngo ndetse n’ihohoterwa rikorerwa mu miryango. Yabasabye kandi kuba intumwa nziza bityo nabo bakaba abakangurambaga ba bagenzi babo, bakabashishikariza kubyaza umusaruro aya mahirwe bashyiriweho muri iki cyumweru cy’irangamimerere.

Iki cyumweru cy’irangamimerere cyatangijwe uyu munsi, kizakorerwa mu mirenge yose igize Akarere ka Rwamagana, kikaba cyitezweho gusiga ibibazo byagaragaraga mu irangamimerere bikemutse.