Mu gitondo cyo kuri uyu wa gatandatu tariki ya 02/04/2022, mu cyumba cy’inama cya Motel St Agnes habereye ibirori byo gutangiza ku mugaragaro ihuriro “SUPER WOMEN RWAMAGANA” rigizwe n’abagore 120 bo mu karere ka Rwamagana bishyize hamwe mu rwego rwo kubaka ubushobozi bw’umugore no kumuteza imbere binyuze mu guhuza imbaraga no gufashanya kwicyemurira ibibazo bibangamiye abagore n’umuryango muri rusange, bityo tukuba umuryango ushoboye kandi utekanye. Muri iri huriro, buri mugore azajya yizigamira nibura amafaranga ibihumbi icumi (10,000 Frw) ku kwezi, ni ukuvuga ibihumbi bibiri na magana atanu(2500 Frw) buri cyumweru. Iri tsinda rikaba ryafunguwe ku mugaragaro na Meya Mbonyumuvunyi Radjab uyobora Akarere ka Rwamagana ari nawe wari umushyitsi mukuru muri iki gikorwa.

Muri iyi nama, Hagaragajwe komite iyoboye iri huriro igizwe na: Perezidante Uwamahoro Rehema, Visi Perezidante Inderere Marie Jeanne, Umunyamabanga akaba n’umubitsi ni Umurungi Jeanette, abajyanama ni Uzarama Liliane na Mukamana Francine, abagenzuzi ni batatu aribo Uwanyirigira Claudine, Uzamureba Clementine n’Uwambajemariya Gaudelive naho abashinzwe gukurikiranira hafi imyitwarire y’abanyamuryango ni: Musabyeyezu Dative na Mpinganzima Alexia. 

Agaragaza ishusho y’ihuriro SUPER WOMEN RWAMAGANA; Madamu Uwamahoro Rehema umuyobozi w’iri huriro yabwiye abanyamuryango ko ubu bamaze kwizigamira amafaranga arenga miliyoni eshatu (3,000,000 Frw) kandi ko mu kwezi kwa cumi 12 uyu mwaka bazaba bamaze kwizigamira amafaranga Atari munsi ya miliyoni cumi n’enye(14,000,000 Frw). Yababwiye kandi ko ikigamijwe ukugabana cyangwa kugurizanya, ahubwo ari ukwinjira mu ishoramari ry’igihe kirekire, bagatekereza byagutse bakavunika ariko bazi intego bashaka kugeraho. Uwamahoro Rehema yijeje abanyamuryango ko amafaranga yabo acungiwe umutekano ku buryo bwizewe kandi ko imicungire y’umutungo ari nta macyemwa. Yabashishikarije gushyigikirana nk’abagore, buri umwe agaharanira iterambere rya mugenzi we bityo bakazamukira hamwe.

Meya Mbonyumuvunyi Radjab yashimiye abagore bagize iri huriro rya “SUPER WOMEN RWAMAGANA” kuri iki gitekerezo cyiza bagize; ababwira ko abashigikiye kandi ko n’ubuyobozi bw’Akarere muri rusange bubashyigikiye. Yibukije abagore ko bashoboye kandi bafite imbaraga nyinshi zatanga umusaruro mu gihe zikoreshejwe neza; abasaba gutekereza byagutse ku buryo n’abandi bazabigiraho. Meya Mbonyumuvunyi Radjab yabwiye abanyamuryango b’iri huriro ko bafite imbaraga nyinshi zibashyigikiye, zaba izo babonesha amaso hafi yabo harimo n’iz’abagabo babo ndetse n’izitagaragarira amaso yabo kandi zikomeye.

Intego z’ihuriro “SUPER WOMEN RWAMAGANA” ni ukwiteza imbere binyuze mu kwizigamira, kungurana ibitekerezo harebwa icyazamura imyumvire y’umugore, gushishikariza abagore kwitinyuka, guhugurana mu rwego rwo kubaka umuryango ushoboye kandi utekanye, kwigiranaho byinyuze mu guhanga udushya tugamije guteza imbere umugore, kubaka ubushobozi bw’umugore no gucyemura ibibazo byadindizaga iterambere ry’umugore n’iry’umuryango.