Kuri uyu wa gatatu tariki ya 08/09/2021, Mu cyumba cy'inama cy’intara y’Iburasirazuba habereye igikorwa cyo gutangiza ku mugaragaro ubukangurambaga bwo kurwanya ibibazo bibangamiye abana birimo isambanywa ry'abana, inda z’imburagihe ziterwa abangavu, ibiyobyabwenge mu rubyiruko, ihohoterwa iryo ariryo ryose, amakimbirane mu ngo, imirire mibi n'igwingira, ndetse n’imirimo ivunanye ikoreshwa abana. Ubu bukangurambaga bwateguwe n'ubuyobozi bw’Akarere ka Rwamagana ku bufatanye n'abafatanybikorwa mu iterambere(JADF Rwamagana); hagamijwe gukangurira abaturage kwita ku bana no kurwanya ibiyobyabwenge mu rubyiruko ku bufatanye bw'inzego zose. Mu bitabiriye iki gikorwa banatanze ibiganiro harimo: Hon Depite Uwamariya Odette, Abagize komite nyobozi y’Akarere ka Rwamagana, Jean Paul Habuni Umuyobozi wa RIB mu karere ka Rwamagana, ndetse n’abahagarariye imiryango nka Reseau des femmes, LWD/Masenge Mba Hafi, Never Again Rwanda,…. Insanganyamatsiko y’ubu bukangurambaga ni: “ #TUJYANEMO MU KURENGERA ABANA".

Meya Mbonyumuvunyi Radjab yashimiye abafatanyabikorwa bose bafatanyije n’ubuyobozi bw’Akarere mu gutegura ubu bukangurambaga, asaba ko twese ntawe usigaye, baba abikorera, abayobozi ndetse n’abaturage dukwiye guhagurukira rimwe tukarengera umwana. Yavuze ko ibibazo bikibangamiye uburenganzira bw’umwana bikigaragara hirya no hino mu midugudu ari nayo mpamvu tukibona abana bishora mu buzererezi, mu biyobyabwenge n’ibindi byangiza ejo habo heza. Meya Mbonyumuvunyi yongeyeho ko hari n’ibindi bikibangamiye imikurire myiza y’umwana birimo ibihano birenze, imirimo ivunanye, ndetse n’ihohoterwa ryaba iribabaza umutima cyangwa se umubiri. Ibi byose bikaba aribyo byatumye ubuyobozi bw’Akarere ka Rwamagana butegura ubu bukangurambaga bwo kurengera umwana. Meya Mbonyumuvunyi Radjab yanagarutse ku bikorwa biteganyijwe gukorwa muri ubu bukangurambaga harimo: Gukora inama zihuza abafatanyabikorwa ku rwego rw'Akarere n'Umurenge ; Gukora urutonde rw'abana bavuye mu ishuri kubera kubyara bakaba batarasubiramo; Gusura imiryango ifite abana babyaye bakaba baravuye mu ishuri bashishikarizwa kurisubiramo bagahabwa n'ubufasha bw'ibanze aho bizagaragara ko bukenewe ku bufatanye n'abafatanyabikorwa; Guha ibikoresho abangavu babyaye bize imyuga; Gusura ahantu bigaragara ko hakoreshwa abana imirimo ivunanye; Gushyikiriza inzu abana badafite ababyeyi babaga muri Hameau des jeunes bubakiwe( abana 6 ); Gusura imiryango ifite abana  bavuye mu buzererezi bakaba bakiyirimo bashishikarizwa kuzasubira mu ishuri, Imiryango ifite abana bakiri mu buzererezi izasurwa hafatwe ingamba y'uburyo abana  bagarurwa mu miryango kandi bakayigumamo

Atangiza ubu bukangurambaga, Guverineri w’intara y’Iburasirazuba CG Emmanuel Gasana yashimiye akarere ka  Rwamagana kuri ubu bukangurambagamba bwateguwe mu kunoza imikoranire y’inzego z’ubuyobozi n’abaturage  mu rwego rwo kurinda abana ihohoterwa no kurwanya ibyaha bikorerwa abana, asaba ko habaho ubufatanye hagati y’inzego z’ubuyobozi n’abaturage mu kurinda abana ihohoterwa ribakorerwa , kandi ko hakenewe ubufatanye mu nzego z’ubuyobozi n’abaturage mu kurengera abana kugirango ntihagire umwana wongera kugaragara mu muhanda azerera cyangwa se atiga .