Kuri uyu wa kane tariki ya 24 Gashyantare 2022, mu rwego rwo gukomeza ibikorwa by’icyumweru cyahariwe gahunda ziteza imbere imibereho myiza y’abaturage ndetse n’icyumweru cy’ubukangurambaga #NanjyeNdashoboye bugamije kurengera abana bafite ubumuga; mu murenge wa Karenge habereye igikorwa cyo gutanga amatungo magufi y’ihene ku miryango 14 itishoboye y’abantu bafite ubumuga n’imiryango itishoboye ifite abana bafite ubumuga. Aya matungo akaba arimo gutangwa ku bufatanye bw’ubuyobozi bw’Akarere ka Rwamagana n’umuryango nyafurika w’ivugabutumwa (AEE). Iki gikorwa kikaba kizakomereza no mu yindi mirenge.

Ntwari Emmanuel Umunyamabanga nshingwabikorwa w’umurenge wa Karenge wari uhagarariye ubuyobozi bw’Akarere ka Rwamagana muri iki gikorwa; yashimiye umuryango nyafurika w’ivugabutumwa (AEE) kuri iki gikorwa cyo kuremera imiryango itishoboye y’abafite ubumuga ndetse n’imiryango itishoboye ifite abana bafite ubumuga barimo gufatanyamo n’ubuyobozi bw’Akarere, anasaba  abahawe amatungo kuzayitaho akororoka bityo akababera intangiriro yo kwiteza imbere. Ntwari Emmanuel yabwiye abitabiriye iki gikorwa ko umuntu ufite ubumuga nawe ari umuntu ushoboye kimwe n’abandi, ariyo mpamvu ubuyobozi bwiyemeje gushyigikira abafite ubumuga mu rugendo rwo kwiteza imbere, guteza imbere imiryango yabo ndetse n’igihugu muri rusange.

Icyumweru cyahariwe gahunda ziteza imbere imibereho myiza y’abaturage cyatangiye kuwa mbere tariki ya 21 Gashyantare 2022, kikaba kizasozwa ku cyumweru tariki ya 27 Gashyantare 2022. Ibikorwa birimo gukorwa ahanini bishingiye kugusobanurira abaturage gahunda za leta zigamije gukura abatishoboye mu bucyene binyuze mu biganiro ku maradiyo no mu nteko rusange z’abaturage, kureba umusaruro zitanga, kumenya intambwe abagenerwabikorwa b’izi gahunda bagenda batera umunsi ku munsi. Icyumweru cy’ubukangurambaga #NanjyeNdashoboye bugamije kurengera abana bafite ubumuga cyatangiye ku itariki 18 Gashyantare 2022 bikaba biteganyijwe ko kizasozwa ku itariki ya 25 Gashyantare 2022. Ibikorwa birimo gukorwamo bikaba ari: Gukangurira ababyeyi kuvuza abana bavukanye ubumuga ku gihe, Gukangurira ababyeyi kujyana abana bafite ubumuga mu ngo mbonezamikurire z’abana bato(ECD), Gukangurira abaturage muri rusange gutanga amakuru ku bana bafite ubumuga bakingiranywe mu nzu badahabwa uburenganzira bwabo, Gukangurira ababyeyi n’abarezi kwita ku mpano z’abana cyane cyane abana bafite ubumuga kuko nabo hari ibyo bashoboye, ndetse no Gushishikariza inzego z’abikorera n’abafatanyabikorwa b’Akarere gushyira muri gahunda z’ibikorwa byabo ibikorwa byo kurengera abana bafite ubumuga.