Mu gitondo cyo kuri uyu wa gatanu tariki ya 05/11/2021, mu kagari ka Karambi ho mu murenge wa Muhazi habereye ibirori byo gutaha ku mugaragaro urugo mbonezamikurire rwa Karambi rwubatswe ku bufatanye bw’Akarere ka Rwamagana n’itorero rya EPR, ku nkunga y’umuryango witwa “World servants” ubinyujije muri “Help a Child –Rwanda”. Uru rugo mbonezamikurire rwa Karambi rugizwe n’ibyumba bitatu (3) byo kwigiramo, Ibiro by’ubuyobozi, igikoni cyo guteguriramo amafunguro y’abana, ububiko bw’ibikoresho, ubwiherero bw’abahungu n’ubw’abakobwa ndetse n’ubwagenewe abafite ubumuga, uruzitiro rukikije uru rugo mbonezamikurire ndetse n’ibigega bifata amazi. Ibi bikorwa byose bikaba byaruzuye bitwaye amafaranga y’u Rwanda arenga miliyoni 30. Umushyitsi mukuru muri ibi birori akaba yari Bwana Kakooza Henry Umuyobozi w’agateganyo w’Akarere ka Rwamagana.
 
Mu izina ry’ababyeyi barerera muri uru rugo mbonezamikurire rwa Karambi, Madamu Gasengayiyire Christine Perezidante wa Komite y’ababyeyi yashimiye ubuyobozi bw’Akarere ka Rwamagana ndetse n’abafatanyabikorwa bagize uruhare mu iyubakwa ry’uru rugo mbonezamikurire, avuga ko rugiye kubafasha mu guha abana babo uburere bwiza n’imikurire ikwiye, kandi yizeza ko bazarubungabunga neza, bakarurinda icyarwangiza.

Mu butumwa yagejeje ku bitabiriye ibi birori, Bwana Kakooza Henry umuyobozi w’agateganyo w’Akarere ka Rwamagana yashimiye abafatanyabikorwa b’Akarere ka Rwamagana muri rusange ndetse na Help A child by’umwihariko ku bikorwa bitandukanye bafatanyamo n’Akarere, hagamijwe guteza imbere imibereho myiza y’abaturage. Yavuze ko umuryango “Help A child” umaze kugira ubunararibonye mu guteza imbere ibikorwa bigamije kurengera abana no kwita ku mikurire n’uburere byabo, ariyo mpamvu ubuyobozi bw’Akarere burimo gushaka gufatanya nawo mu kongerera ubushobozi izindi ngo mbonezamikurire zubatswe mu gihe cyashize. Meya Kakooza Henry yijeje ababyeyi ko ubuyobozi buzabahembera abarimu bazajya bigisha muri uru rugo mbonezamikurire, ariko nabo abasaba kurubungabunga no kuzana abana bakiga kandi bakajya babategurira amafunguro y’indyo yuzuye. Yongeyeho ko kuzana umwana mu rugo mbonezamikurire bimuha umutekano kuko aba yiriwe ahantu hatekanye, ariko n’umubyeyi akabona umwanya wo gukora indi mirimo.

Kuri ubu, uru rugo mbonezamikurire rwa Karambi rurimo kurererwamo abana 120 baturuka mu miryango ituye mu kagari ka Karambi ho mu Murenge wa Muhazi; rukagira abarimu 3 bita kuri aba bana ndetse n’abakozi 2 bashinzwe gutegura amafunguro y’abana. Mu rwego rwo kubungabunga uru rugo mbonezamikurire, hakaba harashyizweho komite y’ababyeyi ishinzwe gukurikiranira hafi imikorere y’uru rugo no gutanga inama.