Kuri uyu wa gatandatu tariki ya 13/11/2021, mu karere ka Rwamagana hatowe abagore batanu(5) bangana na 30% by'abazaba bagize inama njyanama y'Akarere ka Rwamagana. Ni amatora yabereye kuri site y'itora yo kuri G.S St Aloys Rwamagana, Inteko itora ikaba yari igizwe n'abagize inama njyanama z'imirenge 14 igize Akarere ka Rwamagana hiyongereyeho abagize komite y'inama y'igihugu y'abagore ku rwego rw’Akarere. Imigendekere y’aya matora yanakurikiranywe na Dr Nyirahabimana Jeanne-Umunyamabanga nshingwabikorwa w’intara y’iburasirazuba ndetse n’indorerezi ziturutse mu biro by’ Urwego rushinzwe kugenzura iyubahirizwa ry’Uburinganire n’Ubwuzuzanye bw’Abagore n’Abagabo mu Iterambere ry’Igihugu (GMO), Ihuriro Nyunguranabitekerezo ry’Imitwe ya Politiki (NFPO) yemewe mu Rwanda, …

Mu itangira ry’aya matora, Kayiranga R.Frank uhuza ibikorwa bya komisiyo y’amatora mu ntara y'iburasirazuba yasobanuriye abagize inteko itora n'abakandida iby’ingenzi bigomba kwitabwaho kugira ngo amatora agende neza harimo no kubahiriza amabwiriza yo kwirinda COVID-19. Hakurikiyeho indahiro z'abakorerabushake ba komisiyo y'igihugu y'amatora ndetse n'indahiro y'umukozi ushinzwe guhuza ibikorwa bya Komisiyo y’igihugu y’amatora (NEC) mu karere ka Rwamagana.

Nyuma y’ibikorwa byo kwiyamamaza kw’abakandida imbere y’inteko itora, Hakurikiyeho gutora mu ibanga, maze amajwi abarurirwa mu ruhame imbere y’abakandida, abagize inteko itora n’indorerezi. Ibarura ry’amajwi ryagaragaje ko abagore 5 batowe bangana na 30% by'abazaba bagize inama njyanama y'Akarere ka Rwamagana ari aba bakurikira: Musabyeyezu Dative, Inderere Marie Jeanne, Kaneza Josiane, Umumararungu Alida na Kayitesi Francine.