Kuri uyu wa 8/3/2023 Hon. Depite Uwamariya Odette na Hon. Depite Beline Uwineza bifatanyije n'ubuyobozi bw'Akarere n'abaturage b'Umurenge wa Gishari ahizihirijwe Umunsi Mpuzamahanga w'Umugore, ku nsanganyamatsiko igira iti: "Guhanga udushya n'ikoranabuhanga biteza imbere uburinganire”

 Ibirori byo kwizihiza Umunsi Mpuzamahanga w'Umugore byahujwe n'itangizwa ry'icyumweru cyahariwe kwimakaza ihame ry'Uburinganire mu Ntara y'Iburasirazuba, hasezeranywa imiryango yabanaga itarasezeranye n'abagore baterwa inkunga yo kubafasha kwiteza imbere. Uyu munsi imiryango 19 yasezeranye kubana byemewe n'amategeko. Mu rwego rwo gushyikirira abagore,hatashywe inzu yubakiwe utishoboye,73 bahabwa imashini zidoda, 2 bahabwa inka,amatungo magufi asaga 73, abagera kuri 5 baterwa inkunga mu bucuruzi naho 3 bahabwa smartphones .

Umuyobozi w'Akarere Mbonyumuvunyi Radjab: "Uyu munsi Mpuzamahanga w'Umugore wahujwe n'ubukangurambaga turimo bwo kwimakaza ihame ry'uburinganire kuko tuzirikana ko umuryango utekanye kandi ushoboye ari wo shingiro ry'Igihugu giteye imbere."

Hon. Depite Uwamariya Odette: "Umunsi Mpuzamahanga w'Umugore ni umwanya wo gusubiza amaso inyuma tukareba aho tugeze tukanashishikariza buri wese ugize umuryango kugira uruhare mu kuwuteza imbere. Ikoranabuhanga rifasha kwihutisha ibyo dukora kugira ngo dukore byinshi kandi mu gihe gito."

Mu birori byo kwizihiza Umunsi Mpuzamahanga w'Umugore byanaranzwe n'umukino w'umupira w'amaguru hagati y'ikipe y'abagore b'Umurenge wa Gishari n'uwa Munyiginya warangiye ikipe ya Munyiginya itsinze 2:1 iya Gishari.