Kuri uyu wa 08/3/2025 mu Karere hizihijwe Umunsi Mpuzamahanga w'Umugore,ku nsanganyamatsiko igira iti:"Umugore ni Uw'agaciro". Abadepite Hon. Hope Tumukunde, Hon. Uwababyeyi Jeannette na Hon. Anastase Nabahire bagize Ihuriro FFRP bari mu Karere bifatanyije n'Ubuyobozi bw'Akarere n'abaturage b'Umurenge wa Nzige mu birori byo kwizihiza uyu munsi  wahujwe no gutangiza Icyumweru cyahariwe kwimakaza ihame ry'uburinganire-GADWeek, ku nsanganyamatsiko igira iti:"Ihame ry'uburinganire, inkingi y'imiyoborere myiza n'iterambere ridaheza kandi rirambye".

Abitabiriye ibi birori bibukijwe ko ibyagezweho mu iterambere ry'umugore n'umukobwa bikwiye gusigasirwa n'amahirwe bashyiriweho akabyazwa umusaruro, no kugira uruhare mu gukuraho inzitizi zikibangamiye ihame ry'uburinganire n'ubwuzuzanye bw'abagore n'abagabo mu kubaka umuryango.

Mu rwego rwo kuremera ubushobozi abagore kugira ngo biteze imbere, mu Murenge wa Nzige, hizihirijwe Umunsi Mpuzamahanga w'Umugore, imiryango 4 yorojwe inka, imiryango 5 ihabwa igishoro cyo gucuruza, abandi bahabwa ibikoresho byo mu rugo.

Ibirori by'Umunsi Mpuzamahanga w'Umugore byasojwe n'umukino w'umupira w'amaguru wahuje ikipe y'abagore y'Akagari k'Akanzu n'iy'ab'Akagari ka Murama kuri Stade ya Nzige.