Mu gitondo cyo kuri uyu wa mbere tariki ya 10/12/2018, mu cyumba cy’inama cya hoteli Dereva iri I Rwamagana, habereye ibiganiro byahuje ubuyobozi bw’ikigo cy’igihugu cy’imiyoborere, abagize inama njyanama, abakozi b’Akarere, abahagarariye ibyiciro byihariye (abafite ubumuga, urubyiruko n’abagore), abahagarariye abikorera n’abandi. Muri iyi nama, ubuyobozi bw’ikigo cy’igihugu cy’imiyoborere (RGB) bwagaragaje raporo y’ibyavuye mu bushakashatsi cyakoze burebana n’uburyo abaturage bishimira serivise bahabwa (CRC 2018), aho Akarere ka Rwamagana kaje ku isonga mu turere twose tw’igihugu. Hatanzwe kandi ikiganiro ku ruhare rw’abagize inama njyanama mu kunoza imiyoborere n’imitangire ya serivise zihabwa abaturage n’abatugana.

Madamu Kazaire Judith, ukuriye ishami ry’imiyoborere, abafatanyabikorwa n’imitangire ya serivise mu kigo cy’igihugu cy’imiyoborere (RGB), yashimiye ubuyobozi bw’Akarere ka Rwamagana kuri gahunda zihariye kajya gategura zo kwegera abaturage, Yasabye ko ubuyobozi bwazahugura abakozi bose ku nzego zose ku bijyanye no kunoza serivise, gushyira ahagaragara ibisabwa kugira ngo umuturage ahabwe serivise (Service standards)  kandi bigakurikizwa, gukomeza gahunda ubuyobozi bw’Akarere bwatangiye yo gusura kenshi no kwegera abaturage mu mirenge, kwisuzuma bakareba niba serivise zitangwa neza, gukomeza kuganira hagati y’ubuyobozi n’abakozi nk’ikipe no kugisha inama aho biri ngombwa ndetse no gufatira ibihano umukozi wese basanga abavangira agatanga serivise idahwitse, Kuko ubuyobozi bushingiye ku muturage aribwo igihugu cy’u Rwanda cyahisemo.

Perezida w’inama njyanama y’Akarere ka Rwamagana, Bwana Kabagamba Wilson, yashimiye ubuyobozi bw’ikigo cy’igihugu cy’imiyoborere ku nama nziza bwahaye abagize inama njyanama y’Akarere n’abahagarariye ibyiciro bitandukanye ndetse avuga ko ibyo bakuye muri iyi nama bizabafasha mu kurushaho gufata ingamba zo kwegera abaturage no kubaha serivise ibanogeye. Bwana Kabagamba Wilson, yabwiye abari bitabiriye iyi nama, ko gutanga serivise nziza bireba buri wese ukorera mu mu karere ka Rwamagana yaba ukorera leta cyangwa uwikorera, kandi ko iyo bikozwe byigaragaza, bigateza imbere Akarere ndetse n’igihugu muri rusange. 

Nyuma y’uko Akarere ka Rwamagana kaje ku isonga mu mitangire ya serivise ntikakuye mu ruge, kuko ku bufatanye n’iki kigo cy’igihugu cy’imiyoborere (RGB), mu cyumweru cyo kuva kuwa mbere tariki ya 03/12/2018 kugeza kuwa gatanu tariki ya 08/12/2018, bwakoze gahunda yihariye yo gusura abaturage mu mirenge hagamijwe kubagaragariza ibibakorerwa, kubashimira uruhare rwabo mu bikorwa by’indashyikirwa byagezweho no kubakemurira ibibazo. Iyi gahunda ikaba yarakorewe mu mirenge yose igize aka karere.