Kuri uyu wa 29 Nyakanga 2025 Umuyobozi w'Akarere Mbonyumuvunyi Radjab ari kumwe n'Umuyobozi w'Akarere wungirije ushinzwe imibereho myiza n'abandi bayobozi bifatanyije n'Ubuyobozi bw'Itorero EPR n'itsinda ry'abakorerabushake ba World Servants mu muganda wo kubaka ibindi byumba 3 ku rugo mbonezamikurire y'abana bato rwa Wisdom Bridge ECD mu Kagari ka Nyarusange ho mu Murenge wa Muhazi.

Umuyobozi w'Akarere yashimiye World Servants ku rukundo n'inkunga yabo mu guteza imbere uburezi hubakwa amashuri y'incuke n'ingo mbonezamikurire, anabashimira ko bavuye mu gihugu cyabo cy'Ubuholandi bakaza kwifatanya n'abanyarwanda mu bikorwa bifitiye akamaro Umuryango Nyarwanda bityo ko Ubuyobozi bw'Akarere buzirikana uruhare rw'Itorero EPR nk'abafatanyabikorwa b'Akarere mu guteza imbere imibereho myiza y'abaturage.

Biteganyijwe ko ibi byumba by'amashuri 3 bizatangira kwakira abana mu ntangiriro z'umwaka w'amashuri wa 2025/2026 ku buryo uru rugo mbonezamikurire y'abana ruzaba rushobora kwakira abana 180; baziyongeraho abana 90 ku bari basanzwe bakirwa mu byumba byari bihasanzwe.