Kuri uyu wa 27 Kanama 2025 Hon. Depite Nabahire Anastase ari kumwe n’Umuyobozi w’Akarere, Abajyanama mu Nama Njyanama y’Akarere n'abandi bayobozi mu nzego zitandukanye bifatanyije n'abagore bahagarariye abandi mu Nama y'Igihugu y'Abagore(CNF) kuva ku rwego rw'Akagari bari mu nteko rusange y'Inama y'Igihugu y'Abagore, yanasinyiwemo Imihigo ya Mutimawurugo y'umwaka 2025/2026. 

Muri iyi nteko rusange, Inama y'Igihugu y'Abagore ku rwego rw'Akarere yagaragaje ko yesheje Imihigo ya Mutimawurugo y'umwaka 2024/2025 ku kigero cya 98% n'Imirenge ishimirwa ubufatanye n'uruhare yagize muri iyi mihigo. Umuhuzabikorwa w'Inama y'Igihugu y'Abagore  ku rwego rw’Intara y’Iburasirazuba,Mme Mukamucyo Jeannette yashimye uburyo Ubuyobozi       bw'Akarere n'abayobozi mu Mirenge bashyira hamwe n'Inama y'Igihugu y'Abagore mu kwesa Imihigo ya Mutimawurugo ku buryo imihigo yose yeshejwe ku kigero cyo hejuru ya 96%.

Hon. Depite Nabahire Anastase yashimye uruhare abagore bagira mu miyoborere no mu kubaka Igihugu,abasaba kwimakaza ihame ry'uburinganire n'ubwuzuzanye, gukora ibikwiye no kuba abanyarwandakazi beza bateza imbere umuryango n'Igihugu no gufatanya n'abagabo n'urubyiruko mu kurwanya ibiyobyabwenge

Muri uyu mwaka w’ingengo y’imari 2025/2026 Inama y’Igihugu y’Abagore mu Karere yahize Imihigo ya Mutimawurugo 10 hagamijwe kugira umugore ushoboye ugira uruhare mu iterambere ry’umuryango n’igihugu, hubakwa umuryango ushoboye kandi utekanye.

Muri uyu mwaka w’ingengo y’imari Inama y’Igihugu y’Abagore ku rwego rw’Akarere izafatanya n’izindi nzego n’abafatanyabikorwa kwegera imiryango mu midugudu yose igize Akarere, kugira ngo imiryango ifite ibibazo by’ubukene bukabije ifashwe guhindura imyumvire no kubakirwa ubushobozi mu kwivana mu bukene binyuze mu  biganiro bihoraho mu miryango  kubaherekeza, abayigize batangire kuzigama no kugurizanya, gushora imari no guhanga imirimo, bazamure imibereho yabo.

Inama y’Igihugu y’Abagore ku rwego rw’Akarere yahize kuzagira uruhare mu kuzamura imyumvire y’ababyeyi bafite abana bagaragaraho imirire mibi n’ibyago byo kugwingira muri buri mudugudu, binyuze mu biganiro mu rugo, mu nyigisho zo mu ngo mboneza mikurire z’abana, igikoni cy’umudugudu. Mu rwego rwo gukumira hazubakwa umurima w’imboga n’igiti cy’imbuto muri buri muryango, hakurikiranwe ko bafite  ubwinshingizi bwo kwivuza, kwipimisha kwa muganga  ku babyeyi batwite , gukingiza abana bari mu gihe cyo gukingirwa n’ubumenyi kuri gahunda zo kuboneza urubyaro.

Inama y’Igihugu y’Abagore ku rwego rw’Akarere yahize kugira uruhare mu gucyemura ikibazo cy’isuku muri buri mudugudu, binyuze mu nyigisho no gutoza umuco w’isuku  ku mubiri, ubwiherero  n’aho batuye muri rusange, hubakwa ubwiherero mu ngo zitabufite cyangwa izifite ubutujuje ibisabwa, gukurikirana imiryango igaragaramo umwanda binyuze mu kubasura bihoraho, ibiganiro n’imiganda  yihariye

Inama y’Igihugu y’Abagore ku rwego rw’Akarere izagira uruhare mu gukemura ikibazo cy’abana batajyanwa mu ishuri n’abaritaye yibanda ku kugarura abana bataye ishuri, kuganiriza imiryango bakomokamo muri buri mudugudu n’ubukangurambaga ku mashuri n’ababyeyi kugira ngo abana bajye ku ishuri, bagume ku ishuri, bige neza kandi batsinde.

Inama y’Igihugu y’Abagore ku rwego rw’Akarere kandi izagira uruhare mu gukemura ibibazo by’ihohotera rishingiye ku gitsina n’amakimbirane mu miryango; yita cyane ku miryango irangwamo amakimbirane n’ihohotera rishingiye ku gitsina  muri buri mudugudu, binyuze mu gusura ingo no kuziganiriza, ibiganiro mu masibo ku kubaka umuryango mwiza, gukira ibikomere by’amateka, gukumira no gukemura amakimbirane, amatsinda y’ubufatanye, guherekeza abahohotewe  kubona service hifashishijwe gahunda zinyuranye ziriho.

Umuyobozi w’Akarere Bwana Radjab Mbonyumuvunyi yashimiye abagore n’Inama y’Igihugu y’Abagore ku ruhare bagira mu gufatanya na basaza babo mu gukemura ibibazo biri mu miryango, kurera abana no gufatanya n’Ubuyobozi bw’Akarere mu kwesa imihigo igamije kubaka Umuryango ushoboye kandi utekanye.