Kuri uyu wa 25Nyakanga 2025 Umuyobozi w'Akarere ari kumwe n'abandi bayobozi b'inzego z'umutekano mu Karere yayoboye inama y'umutekano yaguye yigaga ku ngingo zirimo inyandikomvugo y'inama iheruka, uko umutekano wifashe mu Karere, imigendekere ya gahunda y'Intore mu biruhuko, n'uko igikorwa cy'Ikigo cy'Igihugu cy'Ibarurishamibare cyo gusuzuma ishyirwamubikorwa ry'imihigo y'umwaka 2024/2025 cyagenze.

Abitabiriye inama bafashe imyanzuro n'ingamba zigamije gukumira no kugabanya ibyaha n'impamvu zitera ibyaha byagaragajwe hamwe n'ibigira uruhare mu guteza umutekano mucye, banemeza kurushaho gukora ubukangurambaga bugamije kugabanya impanuka bwa “Gerayo Amahoro” no gukangurira abaturage kwirinda ubusinzi n'ibiyobyabwenge. 

Muri iyi nama kandi hashimwe ubwitabire bw'urubyiruko muri gahunda yo kwita ku rubyiruko mu biruhuko ndetse n'ubushake bw'ababyeyi mu kohereza uru rubyiruko kuri site zatoranyijwe ziberaho iyi gahunda; Imirenge isabwa gufasha uru rubyiruko kubona ibikenewe nk'ababagezaho ibiganiro, imipira yo gukina, amazi meza n'isuku ku bibuga uru rubyiruko ruba ruri muri gahunda yo kwidagadura no guteza imbere impano.

Abitabiriye inama kandi bagejejweho n'umuyobozi w'ishami rya WASAC mu Karere ingamba zihari mu gukemura ikibazo cy'amazi macye mu Karere banagezwaho raporo y'ubugenzuzi bw'imyubakire n'iyubahirizwa ry'igishushanyombonera cy'imikoreshereze y'ubutaka mu Karere n'imitunganyirize y'imijyi.