Kuri uyu wa 28/2/2025 Umuyobozi w'Akarere Bwana Mbonyumuvunyi Radjab, ari kumwe n'abandi bayobozi b'inzego zikorera mu Karere, yasoje Urugerero rw'Inkomezabigwi icyiciro cya 12, rurangijwe n'Intore z'urubyiruko 2,199 zarangije amashuri yisumbuye zigatumwa ku rugerero mu Mirenge 14 y'Akarere, anashimira izi ntore ku bikorwa biteza imbere imibereho myiza y'abaturage.

Mu gihe cy'amezi 2 izi Nkomezabigwi zari zimaze ku rugerero zubakiye abaturage batishoboye inzu 24,ibikoni 28, ubwiherero 23, zitunganya imihanda ireshya na Km 17, zikora imirima y'ibikoni 127,zicukura ibimoteri 474, zinasana inzu 60 z'abatishoboye n'ibikoni 28, n'ubwiherero 149.

Uretse imirimo y'amaboko, izi ntore zanakoze ubukangurambaga butandukanye kuri gahunda ya Ejo Heza, ubwisungane mu kwivuza na gahunda yo kwimakaza isuku hose ndetse zinakangurira abaturage kurwanya SIDA n'ingengabitekerezo ya Jenoside.

Umuyobozi w'Akarere, Mbonyumuvunyi Radjab : "Turashimira Intore zitabiriye Urugerero ku bushake kandi zigakora zitiganda. Turashimira ababyeyi bemereye izi ntore kwitabira Urugerero kandi bakabaha ibikenerwa buri munsi. Turanashimira abafatanyabikorwa batubaye hafi kuva uru Urugerero rutangiye kugeza none. Mboneyeho kubasaba kuzakomereza Urugerero aho muzaba muri hose no kurangwa n'ikinyabupfura, mukirinda ibiyobyabwenge, uburara n'indi mico mibi ijya igaragara mu rubyiruko, indangagaciro na kirazira z'umuco nyarwanda zikomeze kubaranga aho muzaba muri hose."

Izi Nkomezabigwi icyiciro cya 12 zisoje Urugerero zatangiye kuva tariki 13Mutarama 2025, ku nsanganyamatsiko igira iti: "Duhamye umuco w'ubutore, ku rugerero rwo kwigira",zikaba zirusoje zarahawe n'amasomo atandukanye arimo ibiganiro 13, zigishijwe akarasisi n'intambwe y'Intore. Ku rwego rw'Akarere, umuhango wo gusoza Urugerero ry'Inkomezabigwi icyiciro cya 12 wabereye mu Murenge wa Muyumbu.