Kigabiro: Guverineri Mufulukye na Depite Nyiragwaneza bifatanyije n’Abanyarwamagana mu kwibuka Abatutsi biciwe mu bitare bya Rutonde no mu rwunge rw’amashuli rwitiriwe Mutagatifu Aloyizi rw’I Rwamagana
Mu gitondo cyo kuri uyu wa mbere tariki ya 16/04/2018, Guverineri w’intara y’iburasirazuba, Mufulukye Fred na Depite Nyiragwaneza Athanasie bari kumwe n’abahagarariye inzego z’umutekano muri iyi ntara n’akarere ka Rwamagana ndetse n’abagize komite nyobozi yako, bifatanyije n’abaturage b’Akarere ka Rwamagana mu kwibuka ku nshuro ya 24 Abatutsi bazize Jenoside biciwe mu bitare bya Rutonde no mu nkengero zaho ndetse n’abiciwe mu kigo cy’urwunge rw’amashuli rwitiriwe Mutagatifu Aloyizi rw’I Rwamagana. Mu gitondo, Uyu muhango wahereye ku rwibutso rwo mu bitare rwa Rutonde rushinguyemo imibiri 785 y’inzirakarengane ziciwe kuri uyu musozi naho ku gicamunsi, ukomereza ku rwibutso ruri imbere ya Kiliziya Gatulika y’I Rwamagana, ahashyinguye imibiri 741 y’Abatutsi biciwe mu rwunge rw’amashuli rwa Mutagatifu Aloyizi rw’I Rwamagana no mu nkengero zaho.
Ubuhamya bwatangiwe ku nzibutso za Jenoside zombi, Murerakazi Germaine warokokeye mu bitare bya Rutonde ndetse na Mukangarambe Clementine warokokeye mu mujyi wa Rwamagana bagaragaje uburyo kuva muri 1957, umututsi yatotejwe, abuzwa amahwemo, aricwa, aho hose ari uburyo leta mbi yari iriho yabaga irimo kugerageza Jenoside ari nayo yaje gushyirwa mu bikorwa mu mwaka w’1994. Abacitse ku icumu rya Jenoside yakorewe Abatutsi banashimiye ubutwari bw’ingabo zari iza RPF Inkotanyi zafashe iya mbere zikitanga zigatabara bityo bakarokoka, ndetse banashimira ubuyobozi bwiza bwa leta y’ubumwe bwahaye ikizere cyo kongera kubaho.
Ku rwibutso ruri imbere ya Kiliziya gaturika y’I Rwamagana, Hon. Depite Nyiragwaneza Athanasie yibukije abari bitabiriye uyu muhango ko abo Jenoside yadutwaye bari ingirakamaro ku gihugu ari nayo mpamvu dukwiye guhora tubibuka. Depite Nyiragwaneza yanenze bikomeye ubuyobozi bubi bwateguye Jenoside, bukayigisha mu banyarwanda kugeza buyishyize mu bikorwa ikadutwara miliyoni irenga y’abantu. Yanenze kandi umuntu wese wahemukiye u Rwanda n’abanyarwanda akagira uruhare urwo arirwo rwose muri Jenoside yakorewe Abatutsi. Aha, Depite Nyiragwaneza akaba yaboneyeho ashimira ingabo zahagaritse Jenoside, ashimira ubuyobozi bwongeye kubanisha abanyarwanda bundi bushya ndetse n’abagize abo bahisha ntibicwe mu gihe cya Jenoside.
Guverineri Mufulukye Fred, wari umushyitsi mukuru muri uyu muhango, yabwiye abacitse ku icumu ko leta y’ubumwe itahwemye kandi itazahwema kubazirikana kuko izi neza ibikomere basigiwe na Jenoside, bityo abahumuriza ababwira ko bafite igihugu n’ubuyobozi bwiza bubitayeho. Guverineri Mufulukye yasabye abaturage b’Akarere ka Rwamagana n’umurenge wa Kigabiro by’umwihariko, gukura isomo mu mateka yaranze u Rwanda kuko n’abateguye Jenoside bakayishyira mu bikorwa ntacyo bungutse, ahubwo icyaha bakoze gihora kibakomanga ku mutima kikababuza amahoro. Guverineri Mufulukye yakomeje asaba abaturage kwita ku bumwe bw’abanyarwanda, bagashyira imbere ubufatanye muri byose. Mu gusoza, Guverineri Mufulukye nawe akaba yashimiye ingabo zari iza RPF Inkotanyi zahagaritse Jenoside.