Kuri uyu wa 07/4/2025 Guverineri w'Intara y'Iburasirazuba Hon. Pudence Rubingisa n'abagize inama y'umutekano itaguye y'Intara bifatanyije n'Ubuyobozi bw'Akarere n'abaturage mu gutangiza icyumweru cy'icyunamo n'ibikorwa byo kwibuka ku nshuro ya 31 Jenoside yakorewe Abatutsi mu 1994 ku rwibutso rwa Ruhunda, Gishari; aho abayobozi n'abaturage bunamiye abazize Jenoside yakorewe Abatutsi banashyira indabo ku rwibutso rwa Ruhunda mu guha icyubahiro imibiri y'Abatutsi 5081 bishwe muri Jenoside bahashyinguwe.

Umuyobozi w'Akarere Bwana Mbonyumuvunyi Radjab yihanganishije anakomeza abitabiriye iki gikorwa cyo gutangiza Icyumweru cy'Icyunamo, yibutsa ko Umurenge wa Gishari ufite inzibutso 2 bigaragaza ubukana Jenoside yakorewe Abatutsi yakoranywe muri uyu Murenge ariko anashimira abarokotse Jenoside bataherwanwe n’agahinda bagakomeza kwiyubaka, yibutsa ko kwibuka Jenoside yakorewe Abatutsi ari n'umwanya wo kuzirikana ubutwari bwaranze Ingabo za RPA/Inkotanyi zahagaritse Jenoside yakorewe Abatutsi, zirangajwe imbere na Nyakubahwa Paul Kagame, anahumuriza abaturage ko Jenoside itazongera mu Rwanda.

Perezida wa Ibuka/Rwamagana, Mme Musabyeyezu Dative: "Ibikorwa byo kwibuka abacu bitubera umusingi ukomeye; ari na ho dukura imbaraga zo kongera kwiyubaka. Muri iyi myaka 31 ishize, turashimira Leta y'Ubumwe ko yongeye kugarurira abarokotse Jenoside icyizere cy'ubuzima."

Guverineri w'Intara y'Iburasirazuba Hon. Pudence Rubingisa: ":Gishari yari icyicaro cya Komini Muhazi, ubu ni Imirenge ya Gishari, Munyiginya, igice cya Fumbwe,Muhazi n’icya Mukarange yari iyobowe na Burugumesitiri w’Umusigire Rutagengwa, utarashatse kurwana ku baturage ayoboye, baricwa abandi bakabakurikirana bakabaroha muri Muhazi. Muri uyu Murenge wa Gishari by’Umwihariko hanabaye ingabo za MINUAR, iyo tuvuga uruhare rw’amahanga muri Jenoside yakorewe Abatutsi, mwe mubyumva kurusha n’ahandi. Igihe bahamaze babafashije iki? babarengeye iki? Ni izihe mpinduka mu mibereho zagaragaye? Umunsi nk’uyu ni ukuzirikikana ko kubera iyo Politiki mbi, abacu bishwe urw’Agashinyaguro tukaba turi aha ngo tubibuke. Turabasaba kurwanya ingengabitekerezo ya Jenoside,  twimakaze inzira y’Ubumwe n’Ubudaheranwa, twiyubakire Igihugu cyacu nk’Abanyarwanda."

Guverineri kandi yabwiye abitabiriye igikorwa cyo kwibuka ku nshuro ya 31 Jenoside yakorewe Abatutsi , ko iyi minsi 100 twinjiyemo, ari umwanya wo gukomeza kuzirikana amateka yacu ariko duharanira ko ibibi byabaye bitazongera ukundi no guhangana n’abashaka kugoreka amateka yacu mu nyungu zabo bwite.

Uyu munsi kandi hatanzwe ubuhamya n'ikiganiro gishimangira ko mu gihe twibuka Jenoside yakorewe Abatutsi bikwiyekudufasha kurwanya no gukumira ingengabitekerezo y’urwango n’amacakubiri yasenye umuryango Nyarwanda kandi ko ubumwe bwacu buruta ibyadutanya uko byaba bimeze kose.

Dukomeze “Kwibuka Twiyubaka”