Mu gitondo cyo kuri uyu uyu gatandatu tariki ya 02/04/2022, urugo mbonezamikurire rwo ku isoko rya Kigabiro rwasuwe na Madamu Catherine M. Russell uybora Ishami ry’Umuryango w’Abibumbye ryita ku bana (UNICEF) ku rwego rw’isi ari kumwe n’abandi bashyitsi batandukanye barimo: Kirsi Madi Umuyobozi mukuru mu biro by’Umuyobozi wa UNICEF ku isi; Julianna Lindsey uhagarariye UNICEF mu Rwanda; Min Yuan umuyobozi wungirije wa UNICEF mu Rwanda; Charles Avelino Umuyobozi mukuru ushinzwe iterambere ry’uburezi muri UNICEF mu Rwanda; Umutoni Gatsinzi Nadine umuyobozi w’ikigo cy'igihugu gishinzwe imikurire no kurengera umwana(NCDA) ndetse na Rose Rwabuhihi umuyobozi w’icyubahiro wungirije wa Imbuto Foundation. Aba bashyitsi bose bakaba bakiriwe na Meya Mbonyumuvunyi Radjab.

Urugo mbonezamikurire rwo ku isoko rya Kigabiro (Kigabiro market based Early Childhood Development center)  rwashyizweho mu mwaka wa 2019 ku bufatanye bw’ubuyobozi bw’Akarere ka Rwamagana n’Umuryango uharanira iterambere ry’umuturage n’uburenganzira bwa muntu (ADEPE) hagamijwe gucyemura ikibazo cy’abana baburaga uko bitabwaho mu gihe ba nyina bagiye gucuruza mu isoko. Kugeza ubu rwakira kuva ku bana bamaze amezi arindwi bavutse kugeza ku bafite imyaka itatu. Abana bamaze kurunyuramo bakaba baragiye gutangira amashuri y’incuke n’abanza ni 130 naho abarimo kururererwamo uyu munsi ni 60 barimo abakobwa 33 n’abahungu 27.

Muri uru ruzinduko, Madamu Catherine M. Russell uybora Ishami ry’Umuryango w’Abibumbye ryita ku bana (UNICEF) ku rwego rw’isi yasobanuriwe uburyo bwifashishwa mu gukangura ubwonko bw’abana bakurikiranirwa muri uru rugo mboneza mikurire(Early stimulation), uko bahabwa indyo yuzuye kandi hakitabwa ku isuku n’isukura yabo, uburyo abita ku bana bisanisha nabo, ndetse anasura ibice bitandukanye by’uru rugo mboneza mikurire. Ababyeyi n’abajyanama b’ubuzima batanze ubuhamya bw’uburyo urugo mbonezamikurire rwo ku isoko rya Kigabiro rwabafasjije mu kurushaho kwita ku mikurire y’abana no kubarinda imirire mibi.