Kuri uyu wa gatatu tariki ya 07/08/2019, Madamu Natasha Hayward ukuriye ibikorwa mu kigega cy’isi gishinzwe gutera inkunga ubuhinzi no kwihaza mu Biribwa kizwi mu rurimi rw’Icyongereza nka “Global Agriculture and Food Security Program (GAFSP)”, yasuye ibikorwa bigamije guteza imbere ubuhinzi byo mu karere ka Rwamagana, byubatswe ku nkunga ya Banki y’isi (World Bank) binyuze mu mishinga ibiri ariyo: Umushinga wo kongera umusaruro w’ubuhinzi no kwihaza mu biribwa uzwi mu rurimi rw’Icyongereza nka “Sustainable Agricultural Intensification and Food security Project (SAIP)” ndetse n’Umushinga wo gutunganya ubutaka, gufata amazi no kuhira imirima y’imusozi (Land husbandry Water harvesting and Hillside irrigation project (LWH).

Muri uru ruzinduko, Madamu Natasha Hayward yasuye ubuhunikiro bwubatswe mu kabuga ka Musha ndetse asura n’icyuzi cyuhira (Valley dam) cya Nyirabidibiri cyuhira imyaka ihinzwe mu gishanga cya Nyirabidibiri no ku nkengero yacyo. Ubwo Madamu Natasha Hayward yasuraga ubuhunikiro, Bwana Ntaganda Jean de Dieu ukorana n’ikigo cy’Ubuhahirane cya Afurika y’Uburasirazuba (East Africa Exchange-EAX) yamubwiye ko kuva hagiyeho ubuhunikiro nk’ubu byatumye abahinzi bahuzwa n’abaguzi, bityo umusaruro wabo ukagurwa ku giciro gitubutse mu gihe mbere wasangaga abamamyi bawugura kuri macye cyane abahinzi bakabihomberamo. Yongeyeho ko ubu buhunikiro bufite ubushobozi bwo kubika umusaruro mu gihe cy’imyaka 2 utari wangirika. Ku cyuzi cyuhira cya Nyirabidibiri, Madamu Natasha yiyumviye ubuhamya bw’abahinzi bibumbiye muri koperative GWIZA RW34 ikorera ubuhinzi muri iki gishanga cya Nyirabidibiri kiri hagati y’imirenge ya Nzige, Gahengeri, Rubona na Mwulire; ndetse areba uburyo bukoreshwa mu kuhira.

Meya Mbonyumuvunyi Radjab yavuze ko ugereranyije ubuzima bw’abaturage mbere y’uko icyuzi cyuhira imyaka (Valley dam) cya Nyirabidibiri cyubakwa na nyuma y’uko cyubatswe kikaba gikoreshwa, imibereho yabo n’iterambere byabo bigenda bizamuka. Yongeyeho ko n’ubwo bikiri mu ntangiriro, ariko kugeza ubu umusaruro uboneka umaze kwikuba incuro 7 uwabonekaga mbere. Mu izina ry’abaturage b’Akarere ka Rwamagana akaba yashimiye Banki y’isi (World Bank) ndetse n’ikigega cy’isi gishinzwe gutera inkunga ubuhinzi no kwihaza mu Biribwa “Global Agriculture and Food Security Program (GAFSP)” ku kuba bafatanya na leta y’u Rwanda mu guteza imbere ibikorwa by’ubuhinzi ndetse yizeza ko nk’ubuyobozi bw’Akarere n’inzego bafatanya bazakomeza kubyaza umusaruro ibi bikorwa ndetse no kubibungabunga babirinda icyabyangiza.

Madamu Natasha Hayward yavuze ko ikigega cy’isi gishinzwe gutera inkunga ubuhinzi no kwihaza mu Biribwa “Global Agriculture and Food Security Program (GAFSP) gikorana n’ibihugu bitandukanye mu birebana no guteza imbere ubuhinzi no guhindura imibereho y’abahinzi muri rusange. Yongeyeho ko yishimiye kuba yabashije kugera aho ibikorwa biri, no kureba icyo amafaranga yatanzwe yakoreshejwe ndetse n’abahinzi yagiriye akamaro. Yishimiye ubuhamya yumvise, kandi ko n’ibikorwa byakozwe byose ari ingirakamaro. Madamu Natasha yijeje abahinzi ko ikigega cy’isi gishinzwe gutera inkunga ubuhinzi no kwihaza mu Biribwa “Global Agriculture and Food Security Program (GAFSP) kizakomeza gushyigikira leta y’u Rwanda mu bikorwa nk’ibi biteza imbere abaturage.