Ku gicamunsi cyo kuri uyu wa kabiri tariki ya 13 Gicurasi 2025 Minisitiri w'uburinganire n'iterambere ry'umuryango Mme UWIMANA Consolee, akaba n'Imboni y'Akarere ka Rwamagana muri Guverinoma, ari kumwe n'abandi bayobozi bifatanyije n'Ubuyobozi bw'Akarere n'abaturage b'Umurenge wa Gishari mu nteko rusange z'abaturage zateraniye mu Kagari ka Ruhunda. 

Mu butumwa yagejeje kuri aba baturage, Minisitiri Uwimana Consolée yakanguriye abaturage kwirinda ibyangiza umuryango; birimo ubusinzi n'ibiyobyabwenge, gucana inyuma n'ubuharike ahubwo bakimakaza ibiganiro byiza hagati y'abawugize; bakarushaho gukundana, kwita ku bana no kwiteza imbere bazirikana ko umuryango ari wo shingiro ry'Igihugu, bagaharanira kubaka umuryango utekanye kandi ushoboye.

Muri izi nteko rusange kandi abaturage bagejeje ku bayobozi ibyifuzo n'ibibazo bafatanya kubikemura. Ukwezi kwahariwe umuryango kuzatangira tariki 15 Gicurasi 2025, ku nsanganyamatsiko igira iti:"Ibiganiro byiza, ireme ry'umuryango"