Kuri uyu wa 13/1/2025 Umuyobozi Nshingwabikorwa ushinzwe ubushakashatsi n'iterambere rya Politiki muri MINUBUMWE Dr. Rutayisire Theoneste ari kumwe n'Umuyobozi w'Akarere Bwana Mbonyumuvunyi Radjab n'abayobozi b'inzego z'umutekano mu Karere batangije Urugerero rudaciye ingando rw'Inkomezabigwi icyiciro cya 12, rwitabiriwe n'Intore 2,334 zo mu Karere zirangije amashuri yisumbuye.

Ku rwego rw'Akarere Urugerero rwatangirijwe mu Murenge wa Muhazi rukazakorwa mu mirenge 14 yose y'Akarere. Intore z'Inkomezabigwi icyiciro cya 12 zahize kwesa imihigo irimo kubakira abatishoboye inzu 16, gutunganya imihanda, kubaka ibikoni n'ubwiherero by'abatishoboye, kurwanya imirire mibi bakora imirima y'igikoni bakazakora ubukangurambaga butandukanye kuri gahunda za Leta.

Umuyobozi w'Akarere Mbonyumuvunyi Radjab yashimiye ababyeyi bohereje abana ku rugerero, intore z'Inkomezabigwi zitabiriye uru rugerero n'abafatanyabikorwa barimo n'abatoza, asaba izi ntore kuzitwara neza ku rugerero no kurangwa n'indangagaciro z'umuco nyarwanda.

Kuri uru rugerero rufite insanganyamatsiko igira iti: "Duhamye umuco w'ubutore ku rugerero rwo kwigira",uretse ibikorwa by'ubwitange bigamije guteza imbere imibereho myiza,abarwitabiriye bazahabwa amasomo y'ibiganiro, imikoro ngiro n'ibitaramo banigishwe gahunda n'intambwe y'intore.

Umuyobozi Nshingwabikorwa ushinzwe ubushakashatsi n'iterambere rya Politiki muri Minisiteri y'Ubumwe bw'abanyarwanda n'Inshingano Mboneragihugu, Dr. Rutayisire Theoneste yibukije urubyiruko rw'Inkomezabigwi icyiciro cya 12 ko urugerero ari imwe muri gahunda yavomwe mu muco w'abanyarwanda mu rwego rwo kongera kubaka Igihugu cyari cyarasenywe na Jenoside yakorewe Abatutsi abasaba ko umwanya babonye wo kujya guhugurwa ku rugerero kuwufata nk'amahirwe akomeye badakwiye kwirengangiza anabizeza ko Igihugu kizakomeza kubashyigikira mu bikorwa byiza nk'urubyiruko.

Urugerero rw'Inkomezabigwi icyiciro cya 12 rwatangijwe none ruzarangira tariki 28/2/2025.