Kuri uyu wa 15/10/2024 mu Mirenge yose y'Akarere hateranye inteko rusange z'abaturage zahujwe no kwizihiza umunsi mpuzamahanga w'umugore wo mu cyaro. Ubuyobozi bw'Akarere n'abandi bagize Inama Njyanama y'Akarere n'abayobozi b'inzego z'umutekano mu Karere bifatanyije n'abatuye Umurenge wa Murenge wa Kigabiro muri ibi birori byabereye mu Kagari ka Sibagire, ku nsanganyamatsiko igira iti: "Ibidukikije: Ubuzima bwacu".

Muri ibi birori, ku bufatanye na FXBRwanda mu mushinga Igire -Turengere Abana, abagore barangije amasomo y'imyuga bahawe ibikoresho byo kubafasha kwihangira imirimo no kwiteza imbere, hanatahwa inzu yubakiwe Uwimana Angelique wo mu Murenge wa Kigabiro.

Kuri uyu munsi Uwotwambaza Marie, utuye mu Murenge wa Kigabiro yatanze ubuhamya bw'urugendo rw'iterambere agezeho abikesha ubworozi bw'inkoko, ku buryo ubu yorora inkoko 2000 z'amagi n'izigera ku 4000 z'inyama, agacuruza amagi n'inyama ndetse akanahugura abashaka korora inkoko.

Mme Uwanyirigira Claudine,Umuhuzabikorwa w'Inama y'Igihugu y'Abagore mu Karere yagaragaje uruhare rw'umugore wo mu cyaro mu iterambere n'intambwe imaze guterwa n'umugore mu ikoranabuhanga,kubungabunga ibidukikije no gufatanya n'abagabo mu kubaka umuryango utekanye kandi ushoboye.

Umuyobozi w'Akarere wungirije ushinzwe iterambere ry'ubukungu Bwana Richards Kagabo Rwamunono yashimiye FXB Rwanda n'abandi bafatanyabikorwa b'Akarere mu guteza imbere abaturage by'umwihariko abagore, asaba abaturage gukomeza kugira uruhare mu kubungabunga ibidukikije, kwita ku mirimo y’ubuhinzi n’ubworozi no kubiteza imbere bigatanga umusaruro uhagije hagamijwe kwihaza mu biribwa, kunoza imirire no gusagurira amasomo.

Abaturage bakanguriwe kwirinda indwara z'ibyorezo zirimo virusi ya Marburg na MPox, kwitabira gahunda y'ubwisungane mu kwivuza n'iy'ubwishingizi bw'igihe kirekire ya Ejo Heza. Mu Murenge wa Kigabiro kandi abaturage 3 borojwe inka hanaremerwa abagore b'amikoro macye.