Kuri uyu wa Kane tariki ya 18/04/2019, ku rwibutso rwa Jenoside yakorewe Abatutsi mu 1994 rwa Mwulire, ruherereye mu murenge wa Mwulire, habereye Umuhango wo Kwibuka ku nshuro ya 25 Abishwe muri Jenoside yakorewe Abatutsi mu 1994.By’umwihariko, abitabiriye uyu muhango bibutse Abatutsi biciwe ku musozi wa Mwulire, ahari hahungiye Abatutsi baturutse mu masegiteri atandukanye y’ibyahoze ari komine Bicumbi na komine Gikoro. Guverineri Mufulukye Fred uyobora intara y’iburasirazuba na Dr Bizimana Jean Damascène uyobora komisiyo y'igihugu yo kurwanya Jenoside (CNLG), abahagarariye inzego z'umutekano n'abandi bayobozi mu nzego zitandukanye, bakaba bifatanyije n'abanyarwamagana muri uyu muhango. Muri uyu muhango, Hashyinguwe mu cyubahiro imibiri 52 isanga indi 26,851 yari isanzwe ishyinguye muri uru rwibutso rwa Jenoside rwa Mwulire.

Meya Mbonyumuvunyi Radjab yavuze ko urwibutso rwa Jenoside yakorewe Abatutsi mu 1994 rwa Mwulire ari rwo rwatoranijwe kuzaba urwibutso rwo ku rwego rw'Akarere ka Rwamagana kuko rufite amateka akomeye ya Jenoside, ahanini ashingiye ku bugome ndengakamere n'ubunyamaswa Jenoside yakorewe Abatutsi yakoranywe. Yavuze ko ubuyobozi bw’Akarere bwamaze gukora inyigo y’uburyo urwibutso rugomba kuzaba rumeze, imirimo yo kubakwa ikaba izatangira mu gihe cya vuba.

Umunyamabanga nshingwabikorwa wa komisiyo y'igihugu yo kurwanya Jenoside, Dr Bizimana Jean Damascène watanze ikiganiro ku mateka ya Jenoside yakorewe Abatutsi mu 1994, uburyo gutegura Jenoside yakorewe Abatutsi mu 1994 byatangijwe na PARMEHUTU ya Gregoire Kayibanda, bikomezwa na MRND ya Juvenal Habyarimana ari nayo yaje kuyishyira mu bikorwa mu mwaka wa 1994. Dr Bizimana yanagaragaje ko ingengabitekerezo ya Jenoside n'urwango Ku Batutsi byagiye byigishwa kuva 1957 ubwo Joseph Gitera yatangazaga amategeko 10 y'abahutu, kandi ko itotezwa Abatutsi bakorewe birukanwa mu kazi no mu mashuli, biri byateguraga Jenoside yakorewe Abatutsi mu 1994, kugeza ubwo ishyize mu bikorwa.

Guverineri Mufulukye Fred yavuze ko ubutwari bwaranze abanya Mwulire muri Jenoside, bagahangana n’interahamwe birwanaho kugeza ubwo interahamwe zibonye ubufasha bwihariye bw’abasirikare n’intwaro zidasanzwe ari ubwo gushimwa no kuzirikanwa. Yavuze ko Nyuma y'imyaka 25, hirya no hino hakiri imibiri myinshi y'abazize Jenoside yakorewe abatutsi mu 1994 itaraboneka ngo ishyingurwe mu cyubahiro; asaba abafite amakuru y'ahakiri iyo mibiri ngo bayatange nayo inshyingurwe mu cyubahiro ikwiye. Guverineri Mufulukye yasabye urubyiruko kuzirikana amateka ya Jenoside yakorewe abatutsi, aho hari urubyiruko rwagize uruhare muri jenoside rwica abantu, hakaba n’urubyiruko rwahagaritse Jenoside. Ashimira Inkotanyi zahagaritse Jenoside na Perezida Paul Kagame wayoboye urugamba. Yasabye urubyiruko kujya rufata ibyemezo rubanje kureba ingaruka za nyuma, bityo rugaharanira gukora icyiza kuko ubugome, no gukora ikibi ntibijya bitsinda. Yabasabye gusigasira ibyagezweho no kurwanya icyo ari cyo cyose cyazana amacakubiri mu banyarwand